काठमाडौं (हाम्रो खेलकुद)– राष्ट्रिय टोलीका स्ट्राइकर बिमल घर्तीमगर सोमबार स्पेन जाने भएका छन् । बिमल सोमबार त्यसतर्फ जाने तयारीमा छन् भने अन्जन २५ गतेतर्फ स्पेन प्रस्थान गरिसकेका छन।  दुवै स्पेनको मार्बेला युनाइटेड एफसीमा रहेर अभ्यास गर्ने र मिले सम्म ट्रायल दिनका लागि त्यसतर्फ जान लागेका हुन् ।

मार्बेला त्यहि क्लब हो जसमा अन्जन र राष्ट्रिय टोलीका रक्षक अनन्त तामाङले गत बर्ष केही साता अभ्यास गर्नुका साथै केही मैत्रीपूर्ण खेल खेलेका थिए । गत बर्ष फागुनमा मार्बेलाले नेदरल्यान्ड्स पुगेर मैत्रीपूर्ण खेल खेलेका थिए । त्यति बेला बिमललाई पनि अभ्यासका लागि बोलाइएपछि उनी चोटका कारण गएनन् । यसपटक अनन्त त्यसतर्फ जाने छैनन् । एएफसी सोलिडारिटी कपका दौरान अनन्तको घुँडामा चोट लागेको थियो । गत महिला घुँडाको शल्यक्रिया गराएका उनी अहिले आराम गरिएका छन् ।

विगतमा जस्तै अहिले पनि लुइस डी ब्रायजले उनीहरुको अभ्यासको व्यवस्था मिलाएका हुन् । व्यक्तिगत कारणले बिमलले अन्जन भन्दा एक हप्ता पछी अर्थात सोमबार  जाने हाम्रो खेलकुद डटकमलाई जानकारी दिए । स्पेन यात्रालाई लिएर बिमल उत्साहित छन् । मैले पहिला पनि युरोप गएर अभ्यास गरिसकेको छु ,’ उनले भने,‘अहिले फेरी मौका मिलेको छ । यो मेरो  लागि सिक्ने अवसर हो र पहिले भन्दा यसपाली अभ्यास र ट्राइलभन्दा केही नयाँ हुने अपेक्ष्या राखेको छु।’

मार्बेला युनाइटेड युएस सकर एकेडेमीको शाखाको रुपमा स्पेनको मालागामा स्थापित क्लब हो । सुरुमा युएस सकरकै नाममा स्थापना गरिए पनि २०१४ मा मार्बेला युनाइटेड एफसी नाम राखिएको क्लबको बेभसाइटमा उल्लेख छ । नेपालले पछिल्लो डेढ बर्षमा फुटबलमा चारवटा उपाधि जितेको थियो ।