एजेन्सी – इंग्लिस क्लब चेल्सीका मिडफिल्डर मेसन माउन्ट अर्काे प्रिमियर लिग क्लब म्यानचेस्टर युनाइटेड जाने भएका छन् ।

युनाइटेडले इंग्लिस मिडफिल्डर माउन्टलाई चेल्सीबाट ५५ मिलियन पाउन्डमा ५ वर्षको लागि सम्झौता गरेको छ । २४ वर्षीय माउन्ट यो समर सिजनमा युनाइटेडमा अनुबन्ध हुने पहिलो खेलाडी बनेको छ ।

चेल्सीले गत सिजन ६ सय मिलियन पाउन्ड खर्च गरेको थियो र फाइनान्सियल फेयर प्लेको तनाव घटाउन चेल्सीले धमाधम खेलाडी कटौती गरिरहेको छ ।

चेल्सीले युनाइटेडको सुरुवाती तीन प्रस्ताव अस्वीकार गरेपनि चौथो प्रस्तावमा दुई क्लब र खेलाडी सहमत बनेको हो । चेल्सीले यसै समरमा माउन्टलाई गुमाउन चाहेको थिएन । तर, अर्काे वर्ष स्वतन्त्र हुने भएका कारण चेल्सीले राम्रो शुल्कमै बेचेको हो ।

माउन्ट यो समरमा चेल्सी छाड्ने आठौं खेलाडी बनेका छन् । काई हाभर्ट्ज आर्सनल र माटियो कोभासिस म्यानचेस्टर सिटीमा पुगेको छ । एडुआर्ड मेन्डी र कालिडो कोउलिबाली साउदीको अल–अहली तथा एन’गोलो कान्टे साउदीकै अल इतिहादमा पुगेका छन् । रुबेन लोफ्टस चिक र टिमोथी बाकायोको एसी मिलान पुगिसकेका छन् ।

६ वर्षको उमेरमा चेल्सीमा आवद्ध भएका माउन्टले सन् २०१९ मा सिनियर टोलीमा डेब्यु गरेका थिए । उनले चेल्सीका लागि १९५ खेलमा ३३ गोल गरेका थिए । गत सिजन चोटका कारण माउन्ट लामो समय मैदान बाहिर रहेका थिए ।

युनाइटेड प्रिमियर लिगमा तेस्रो स्थानमा रह्यो र जबकि प्रशिक्षक एरिक टेन ह्यागले यस समरमा नयाँ फरवार्डलाई प्राथमिकता दिएको छ । माउन्ट त्यही अनुसार अनुबन्ध गरिएको फरवार्ड हो ।

माउन्टले चेल्सीसँग २०२१ मा च्याम्पियन्स लिगसँगै फिफा क्लब विश्वकप र यूईएफए सुपर कप पनि जितेका छन् । इङ्ल्यान्डबाट ३६ क्याप जितेका उनले ५ गोल गरेका छन् । उनी २०२२ को कतार विश्वकपमा इंग्ल्यान्डको टोलीमा थिए ।

माउन्टले चेल्सीको एकेडेमी मार्फत २०१७–१८ को सिजनमा लोनमा भिटेसेमा सामेल हुनुअघि डच लिगमा ९ गोल गरेका थिए । त्यसपछि उनी च्याम्पियनसिप क्लब हुँदै चेल्सीको सिनियर टोलीमा पर्न सफल भएका थिए । त्यसपछि उनी टोलीको प्रमुख खेलाडी बनिसकेका छन् ।