एजेन्सी – इंग्लिस क्लब चेल्सीका सेनेगली डिफेन्डर कालिडो कोउलीबाली साउदी अरेबियाको अल हिलालमा अनुबन्धित भएका छन् ।

कोउलीबाली गत जुलाईमा इटालियन क्लब नेपोलीबाट चेल्सीमा चार वर्षको सम्झौता गरेका थिए । तर, उनले चेल्सीमा एक सिजन बिताएपछि नै क्लब छाडेर अल हिलालमा अनुबन्धित भएका हुन् ।

अल हिलालले कोउलीबालीका लागि कति तिरेको छ भन्ने खुलासा गरेको छैन । तर रिपोट अनुसार २० मिलियन पाउन्ड रहेको अनुमान गरिएको छ ।

‘मेरो पहिलो खेलदेखि मेरो अन्तिमसम्म, यो ब्याज लगाउन पाउनु सम्मानको कुरा हो ।’ कोउलीबालीले ट्विटरमा भने, ‘गत सिजन हामीले चाहेको थिएन, तर म फ्यानहरू र क्लबका सबैलाई तपाईंको समर्थनको लागि धन्यवाद दिन चाहन्छु ।’

सन् २०२० मा नेपोलीलाई इटालियन कप र २०२२ मा सेनेगलले अफ्रिका कप अफ नेसन्स जित्न मद्दत गरेपछि उनी युरोपियन र अन्तर्राष्ट्रिय अनुभवका साथ स्ट्यामफोर्ड ब्रिजमा आइपुगेका थिए । उनले चेल्सीका लागि सबै प्रतियोगितामा जम्मा ३२ खेलमा २ गोल गरेका छन् ।

कोउलीबाली यो सिजन चेल्सी छाड्ने चौथो खेलाडी हुन् । यसअघि काई हाभर्टज, माटियो कोभासिस र एनगोलो कान्टेले यो सिजन चेल्सी छाडिसकेका छन् । काई आर्सनलमा तथा कोभासिस म्यानचेस्टर सिटी प्रथान गर्दा कान्टे साउदी क्लबमा पुगेका छन् ।

गत जनवरीमा पोर्चुगिज भेट्रान फरवार्ड क्रिष्टियानो रोनाल्डो अल नासमा आवद्ध भएसँगै युरोपियन क्लब फुटबलमा व्यस्त रहेका खेलाडीहरु साउदी प्रिमियर लिगमा आबद्ध हुनेको ओइरो लागेको छ ।

यसै सिजन करिम बेन्जेमासँगै रुवेन नेभेस र एनगोलो कान्टेसँगै अन्य खेलाडी साउदीको क्लबमा आबद्ध भइसकेका छन् भने आबद्ध हुने क्रम जारी छ ।