धनगढी (हाम्रो खेलकुद) – ए डिभिजन क्लब लक्ष्मी हुन्डाई मनाङ मस्र्याङ्दी धनगढीमा जारी भागेश्वर गुप्र खप्तड गोल्डकप फुटबल प्रतियोगिताको सेमिफाइनलमा पुगेको छ । धनगढी रंगशालामा मंगलबार भुटानको ड्रुकस्टार फुटबल क्लबलाई २–० ले हराउँदै मनाङ अन्तिम चारमा पुगेको हो ।

सोझै क्वार्टरफाइनल पुगको मनाङ र भुटानी क्लबले पहिलो हाफ गोलरहित बराबरी खेलेका थिए । ५१ औं मिनेटमा ओलावाले आफिजले गोल गरेपछि मनाङले खेलमा अग्रता बनाउको थियो । ८९ औं मिनेटमा सुशिल लामाले गोल गर्दै मनाङको जित सुनिश्चित पारे । मनाङका कप्तान अनिल गुरुङले सुरुआती खेलमा सधैं राम्रो खेल्न नसकेको भन्दै अबका खेलमा प्रदर्शन सुधार हुने विश्वास व्यक्त गरे । मनाङका प्रशिक्षक छिरिङ लोप्साङले भुटानी क्लबको प्रदर्शनको प्रसंसा गरे । उनले आफ्नो टोलीले दोस्रो हाफमा राम्रो प्रदर्शन गरेका कारण जित सम्भव भएको बताए ।

ड्रुकस्टारका सहायक प्रशिक्षक टसी डेन्डुकले विपक्षी टीम वढी अनुभवी भएको र आफ्ना टोलीका खेलाडी कम उमेर र अनुभवका कारण जित्न नसकेको बताए । मनाङका आफिज म्यान अफ दी म्याच घोषित भए । उनले पुस २३ गते टुबोर्ग हेटौडा गोल्डकपको आर्मीविरुद्धको फाइनलमा रातो कार्ड पाएका थिए ।

भागेश्वर गुप्रको मुख्य प्रायोजनमा भईरहेको गोल्डकपमा मनाङअघि भारतको दिल्ली युनाईटेड र आयोजक सुदुरपश्चिम ११ यस अघि नै सेमिफाईनल पुगिसकेका छन । मनाङले सेमिफाइनलमा दिल्ली युनाईटेडसँग प्रतिस्पर्धा गर्नेछ । आयोजक सुदुरपश्चिम ११ ले भने सेमिफाईनलमा नेपाल आर्मी र संकटाको विजेतासँग प्रतिस्पर्धा गर्नेछ । प्रतियोगिताको विजेताले नगद ५ लाख उपविजेताले दुई लाख ५१ हजार नगद पाउनेछन । माघ १ गतेसम्म चल्ने प्रतियोगिताको उत्कृष्ट खेलाडीले मोटर साईकल पाउनेछन् ।

खप्तड गोल्डकप फुटबल प्रतियोगितामा बुधबारको खेल: नेपाल आर्मी क्लब र सिएमजी क्लब संकटा