एजेन्सी – आफ्नो मुख्य खेलाडीविनै विश्वविजेता अर्जेन्टिनाले अन्तर्राष्ट्रिय मैत्रीपूर्ण खेलमा सहज जित हात पारेको छ ।अधिकांश दोस्रो रोजाईको टोली उतारको अर्जेन्टिनाले घरेलु टोली इन्डोनेसियामाथि २–० को सहज जित हात पारेको हो ।

अर्जेन्टिनाको जितमा लियान्द्रो पारेडेस र क्रिष्टियन रोमेरोले गोल गरे । जाकार्तामा सोमबार राति भएको खेलको ३८औं मिनेटमा लियान्द्रो पारेडेसले गोल गर्दै अर्जेन्टिनालाई पहिलो हाफमा १–० को अग्रता दिलाए । उनले एक्सिक्वेल पालासिओसको पासमा गोल गर्न सफल भएका थिए ।

त्यसपछि क्रिष्टियन रोमेरोले ५५औं मिनेटमा गोल गर्दै अर्जेन्टिनालाई २–० को सहज जित दिलाए । दोस्रो रोजाईको टोली उतारेपनि अर्जेन्टिनाले घरेलु टोलीविरुद्ध ७४ प्रतिशत बल पोसेसन राख्न सफल भएको थियो ।

यस जितसँगै अर्जेन्टिना पछिल्लो १० खेलसम्म अपराजित रहन सफल भएको छ । फिफा विश्वकप कतार २०२२ मा साउदी अरेबियासँग २–१ ले स्तब्ध भयएता अर्जेन्टिना अपराजित छ । जसमा ८ जित र २ बराबरीको नतिजा छ । दुई बरबरीको खेलमा पनि अर्जेन्टिनाले टाइब्रेकरमा सफलता हात पारेको छ ।

गत वर्षको १२ जुनमा जोर्डनुँग १–० ले पराजित भएयता पछिल्लो ११ खेलमा इन्डोनेसियाको यो दोस्रो हार हो । यसअघि इन्डोनेसिया ९ जनवरीमा भियतनामसँग २–० ले पराजित भएको थियो । जसमा ६ जित, ३ बराबरी र १ हारको नतिजा थियो ।

इन्डोनेसियाविरुद्ध गोलरक्षक एमिलियनो मार्टिनेजसँगै जुलियन अल्भारेज, निकोलस गोन्जालेस, जर्मन पिजिएला र नाहुएल मोलिनाले पहिलो रोजाईमा खेल्दा मार्काेस एकुना, लुकास ओकम्पास र एलेहान्द्रो गर्नाचोले दोस्रो हाफमा खेलेका थिए ।

इन्डोनेसियाविरुद्धको खेलमा अर्जेन्टिनी प्रशिक्षक लियोनल स्कोलानीले टोलीका कप्तान तथा फरवार्ड लियोनेल मेस्सीसँगै एन्जल डि मारियालाई टोलीमै नराख्दा एन्जो फर्नान्डेस, रोड्रिगो डि पउल, एलेक्सिस म्याक एलिस्टर र निकोलस ट्याग्लिएफिको जस्ता खेलाडीलाई बेञ्चमै राखेको थियो ।