हेटौंडा (हाम्रो खेलकुद) – दोस्रो संस्करणको विजय युथ गोल्डकप फुटबल प्रतियोगिताको असार ५ गते देखि सुरु हुने भएको छ । शनिबार पत्रकार सम्मेलन गर्दै आयोजक विजय युथ क्लबका अध्यक्ष सुदीप राजबहाकले प्रतियोगिता असार ५ गते देखि १५ गतेसम्म हेटौंडा-५ क्याम्पा रंगशालामा हुने प्रतियोगिताको तयारी तीप्र रुपले अघि बढाएको जानकारी दिएका छन् ।

प्रतियोगितामा आयोजकसहित १६ टिमको सहभागिता रहनेछ । राजबहाकका अनुसार प्रतियोगिता विजेता टोलीले नगद दुई लाख सहित ट्रफी, मेडल र प्रमाणपत्र प्राप्त गर्ने छन् । त्यस्तै उपविजेता टोलीले नगद १ लाखसहित ट्रफी, मेडल र प्रमाणपत्र प्राप्त गर्ने छन् । प्रतियोगिताको सर्वोत्कृष्ट खेलाडीले ५ लाख बराबरको बीमा, नगद १० हजार रुपैयाँ प्राप्त गर्ने छन् । प्रतियोगिताको विधागत उत्कृष्ट खेलाडी र प्रशिक्षकले जनही नगद ५ हजार रुपैयाँ प्राप्त गर्ने छन् ।

प्रतियोगितामा हेटौंडा फुटबल एकेडेमी, विजय युथ क्वब, हटिया भेट्रान्स क्लब, ढल्केजोवान एफसी, रिगल हेटौंडा रिसोर्ट मकवानपुर, नागस्वती एफसी, पदमपोखरी युनाइटेड, हर्नामाडी युथ क्लब, एफसी विजय युथ, अग्रसर युथ क्लब, समाजकल्याण एफसी, बागमती प्रदेश प्रहरी गण, चाइना पब्लिक युथ क्लब, चौकीटोल युथ क्लब, पशुपति युवा क्लव, हेटौंडा फुटबल एकेडेमी ए गरी १६ टोली हुनेछन् ।

असार ५ गते साँझ ४ बजे हुने उद्घाटन खेलमा एफसी विजय युथ र अग्रसर युथ क्लबबीच प्रतिस्पर्धा हुनेछ । प्रतियोगितामा झन्डै १३ लाख खर्च हुने आयोजकको अनुमान छ ।

यसअघि प्रतियोगिताको पहिलो संस्करण माघ २०७७ मा सम्पन्न भएको थियो । पहिलो संस्करणको उपाधि आयोजक टिम एफसी विजय युथ क्लबले हात पारेको थियो ।