काठमाडौं (हाम्रो खेलकुद) – भारतको बैंग्लोरमा असार पहिलो सातादेखि आयोजना साफ च्याम्पियनसिप अघिको मैत्रीपूर्ण खेलका लागि फिलिपिन्स जाने नेपाली राष्ट्रिय पुरुष फुटबल टोलीको बिदाई गरिएको छ ।

नेपाली टोली सोमबार त्यसतर्फ प्रस्थान गर्नेछ । अखिल नेपाल फुटबल संघ (एन्फा) ले आइतबार फिलिपिन्स जाने नेपाली टोलीलाई सफलताको शुभकामनासहित बिदाई गरेको हो ।

नेपाली टोलीलाई राष्ट्रिय खेलकुद परिषद (राखेप) का उपाध्यक्ष शिव कोइराला ‘ज्लाला’, एन्फाका अध्यक्ष पंकज बिक्रम नेम्बाङ, महासचिव किरण राई, साफ कमिटिका उपाध्यक्ष सुन्दर नरसिंह जोशी, एन्फाका वरिष्ठ उपाध्यक्ष वीर बहादुर खड्का, उपाध्यक्ष विराट जंग शाही र सदस्य रविन चन्दले बिदाई गरे ।

साफ च्याम्पियनसिपको तयारी स्वरूप नेपालले फिलिपिन्ससँग उसकै मैदानमा मैत्रीपुर्ण खेल खेल्न लागेको हो । नेपालले फिलिपिन्समै करिव तीन दिन प्रशिक्ष गर्नेछ । नेपालले बिहीबार फिलिपिन्ससँग मैत्रीपूर्ण खेल खेल्नेछ । त्यसको भोलिपल्ट नेपाल साफको लागि भारत प्रस्थान गर्नेछ ।

१४औं संस्करणको साफ च्याम्पियनसिप असार ६ देखि १८ गतेसम्म भारको बैंग्लोरमा हुँदैछ । साफमा नेपाल समूह ‘ए’ मा रहेको छ । नेपालको समूहमा साविक विजेता भारत, कुवेत र पाकिस्तान छ ।

समूह ‘बी’ मा लेबनान, माल्दिभ्स, भुटान र बंगलादेश रहेको छ । फिफाको प्रतिबन्धको कारण यस संस्करण श्रीलंकाले खेल्ने छैन् । कुवेत र लेबनान आमन्त्रित टोली हुन् ।

साफको उद्घाटन खेलमा नेपाल र कुवेतबीच असार ६ गते नेपाली समयअनुसार ३ः४५ बजेपछि हुनेछ । ९ असारमा नेपालले आयोजक भारतसँग खेल्नेछ । त्यसपछि समूह चरणको अन्तिम खेलमा नेपालले १२ असारमा पाकिस्तानविरुद्ध खेल्नेछ ।

माल्दिभ्समा आयोजना भएको १३औं साफ च्याम्पियनसिपमा नेपाल भारतसँग ३–० ले पराजित हुँदै उपविजेता बनेको थियो ।

नेपाली टोली

गोलरक्षक – किरण कुमार लिम्बु, दीप कार्की र विशाल श्रेष्ठ

डिफेन्डर – विमल पाण्डे, सनिश श्रेष्ठ, अनन्त तामाङ, देवेन्द्र तामाङ, निशान खड्का, रोहित चन्द र सिमन्त थापा

मिडफिल्डर – पुजन उपरकोटी, एरिक विष्ट, नवीन लामा, मणिकुमार लामा, लाकेन लिम्बु र आवास लामिछाने

फरवार्ड – आयुष घलान, नवयुग श्रेष्ठ, दिपक राज सिंह ठकुरी, अन्जन विष्ट, मनिष डाँगी, आशिष चौधरी र विमल घर्ती मगर

हेड अफ डेलिगेट्स – मनिष जोशी
मुख्य प्रशिक्षक – भिन्सेन्जो अल्बर्टाे एनेसे
सहायक प्रशिक्षक – प्रवेश कटवाल
गोलकिपिङ प्रशिक्षक – विनोद महर्जन
फिजियो – आविष्कार पुडासैनी
मिडिया अफिसर – सरोज श्रेष्ठ
अफिसियल – विवेक राई र शिरिष श्रेष्ठ