काठमाडौं (हाम्रो खेलकुद) – सहिद स्मारक ए डिभिजन लिग २०७९ को अन्तिम खेलमा थ्री स्टार क्लबले जावलाखेललाई पराजित गर्दा भिसा नभएका विदेशी खेलाडी खेलाएको भन्दै नेपाल एपिएफ क्लबले अखिल नेपाल फुटबल संघ (एन्फा) मा उजुरी गरेको छ ।

एपिएफले आइतबार थ्री स्टारका दुई विदेशी खेलाडी पिटर सेगुन र अजायी मार्टिन्सले भिसा नभएको अवस्थामा खेल खेलेको भन्दै उजुरी दायर गरेको हो । थ्री स्टारले अन्तिम खेलमा जावलाखेललाई १-० ले हराएपछि एपिएफ रेलिगेसनमा परेको थियो ।

एपिएफले पत्रमा लेखेको छ ‘थ्रीस्टार क्लब र जाउलाखेल युथ क्लबको खेलमा थ्रीस्टार क्लबबाट सहभागी भएका जर्सी नं. ४५ का मार्टिन्स कायोडे अजायी र जर्सी नं. २४ का सेगुन पिटर खेलाडीहरु बिना भिसा खेल खेलेको प्रमाण पाईएको हुँदा सहिद स्मारक “ए” डिभिजन लीग फुटबल प्रतियोगिता – २०७९ को प्रतियोगिता नियमावली अन्तरगत बुदा नं. ७ को दफा ३ मा उल्लेखित विदेशी खेलाडीहरुको हकमा श्रम स्वीकृती अनिवार्य लिइ भिसाको अवधि कायम हुनु पर्ने प्रावधान रहेकोमा उक्त दिनको खेलमा निज खेलाडीहरु बिना भिषा खेलेको पाईएको साथै मार्टिन्सले मिति २०७०/०२/२३ गते समेत बिना भिषा चर्च ब्वाईज युनाईटेड क्लब विरुद्ध खेलेको स-प्रमाण अध्यागमन विभागको मिति २०६०/०२/२८ गते चलानी नं १५८८ को पत्रानुसार मार्टिन्सको मिति २०८०/०२/१७ गते र सेगुनको मिति २०८०/०२/२३ गते भिसा अवधि समाप्त भएको प्रमाण पाना-४ (चार) संलग्न राखिएको छ ।’

एपिएफले उजुरीसँगै दुई खेलाडीको भिसा अवधि नभएको अध्यागमन विभागको पत्रहरु तथा फिफा र एएफसीलाई पनि यसबारे जानकारी गराउने बताएको छ ।

लिगको नियम अनुसार खेलाडी दर्ता गर्दा विदेशी खेलाडीको श्रम स्वीकृति र भिसा कायम भएको हुनुपर्ने नियम छ ।