काठमाडौं (हाम्रो खेलकुद) – रेलिगेसनबाट जोगिन जित निकाल्नै पर्ने खेलमा जावलाखेल युथ क्लबलाई पराजित गर्दै थ्री स्टार सहिद स्मारक ‘ए’ डिभिजन लिगको रेलिगेसनबाट जोगिएको छ । कप्तान विक्रम लामाले करिअरको अन्तिम खेलमा विजयी पेनाल्टी गोल गर्दा थ्री स्टार रेलिगेसनबाट जोगियो । यस नतिजाले नेपाल एपिएफ फुटबल क्लब भने ए डिभिजन लिगमा आएको १८ वर्षपछि घटुवा भएको छ ।

लिग राउन्डको अन्तिम खेलमा जावलाखेलमाथि १–० को जित निकाल्दै थ्री स्टार रेलिगेसनबाट जोगिएर शीर्ष डिभिजनमा यथावत रहन सफल भएको हो । त्रिपुरेश्वरस्थित दथरथ रंगशालामा शनिबार भएको खेलको सुरुवातदेखि नै बलमाथि पोसेसन राख्दै जावलाखेललाई दवावमा राखेको थ्री स्टारले गोलको लागि दोस्रो हाफको अन्त्यतिर पेनाल्टीको साहरा लिनुपरेको थियो ।
खेलको १८औं मिनेटमा सिफामान्डलाको झन्डै ३५ यार्ड टाढाको प्रहार दोस्रो बार च्याप्दै थोरै बाहिरिदा थ्री स्टार अग्रता लिनबाट चक्यो ।

३५औं मिनेटमा अजायी मार्टिन्सको पेनाल्टी बक्सभित्रको प्रहारलाई जावलाखेलका गोलरक्षक अनिष देउलाले पञ्च गर्दै बचाए । ३८औं मिनेटमा सिफामान्डलाको फ्रिकिक सदुपयोग हुन सकेन । पहिलो हाफको इन्ज्युरी समयको थप गरिएको दोस्रो मिनेटमा विराज महर्जनको कर्नरमा सिफामान्डलाको ट्यापिङ प्रयासले पोस्टको दिशा लिन सकेन । ५०औं मिनेटमा अशोक खवासको फ्रिकिकमा योगेश गुरुङको हेडर पोस्ट नजिकैबाट बाहिरियो ।

७१औं मिनेटमा दिपेश गुरुङको क्रसमा सुनिल तामाङको हेडर पोस्ट नजिकैबाट बाहिरिदा थ्री स्टार अग्रता लिनबाट चुक्यो । ८३औं मिनेटमा विक्रम तामाङले पेनाल्टीमा गोल गर्दै थ्री स्टारलाई १–० को अग्रता दिलाए । पेनाल्टी बक्समा प्रमिन श्रेष्ठले कप्तान विक्रम लामालाई फउल गरेपछि रेफ्री नविन्द्र महर्जनले पेनालटी प्रदान गर्दा विक्रम चुकेनन् । इन्ज्युरी समयमा गोलरक्षक बिट भएको अवस्थामा पिटर सेगुनले गोललाइनबाट क्लियर गर्दै थ्री स्टारको जित पक्का गरे ।

यस जितसँगै थ्री स्टारले २६ खेलबाट ३२ अंक जोडेर नवौं स्थानमा लिगको अन्त्य गरेको छ । पराजित भएको जावलाखेल २६ खेलबाट ३७ अंक जोडेर चौथो स्थानमा लिगको अन्त्य गरेको छ ।