एजेन्सी – यो सिजनको युइएफए च्याम्पियन्स लिगको आज फाइनल हुँदैछ । फाइनलमा इंग्लिस क्लब म्यानचेस्टर सिटी र इटालियन क्लब इन्टर मिलानबीच प्रतिस्पर्धा हुँदैछ ।

यो खेल टर्कीको इस्तानबुलमा रहेको एटाटर्क ओलम्पिया स्टेडियममा नेपाली समयअनुसार राति १२ः४५ बजे हुने छ । इंग्लिस क्लब सिटी इन्टर मिलानलाई पराजित गर्दै पहिलो पटक च्याम्पियन्स लिग जित्ने लक्ष्यमा हुनेछ ।

यस्तै सिटी यो सिजन ट्रेवल उपाधि जित्ने लक्ष्यमा समेत हुनेछ । यो सिजन सिटीले इंग्लिस प्रिमियर लिगसँगै एफए कपको उपाधि जितिसकेको छ ।

सिटीसँग लयमा रहेका नर्वेली फरवार्ड एर्लिङ ब्राउट हालान्डसँगै जुलियन अल्भारेज, केभिन डि ब्रुएना, इल्केए गुन्डोगान, ज्याक ग्रेलिस, बर्नाडो सिल्भा, रोड्री, जोन स्टोन्स, नाथन एके, रुवेन डियास, म्यानुयल एकान्जी र गोलरक्षक एडर्सन मोराएस रहेका छन् । यस्तै फिल फोडेन, एमेरिक लापोर्टा, फिल फोडेन र केल वाल्कर पनि टोलीमा रहेका छन् ।

यता, इटालीको इन्टर मिलान पनि यो सिजन उच्च लयमा रहेका म्यानचेस्टर सिटीलाई स्तब्ध पार्दै १३ वर्षपछि च्याम्पियन्स लिगको उपाधि जित्न चहान्छ ।

सन् २००९–१० को सिजनको फाइनलमा जर्मन क्लब बायर्न म्युनिखलाई २–० ले पराजित गरेर उपाधि जितेयता इन्टर क्वाटरफाइनलभन्दा अघि बढ्न सकेको थिएन ।

इन्टरसँग रोमेलु लुकाकु, इडेन जेको, लोउटारो मार्टिनेज, हकान चलहानोग्लु, डेन्जे डम्फ्रेज, फेडरिको डिमार्काे, मार्सेलो ब्रोजोभिच, निकोला बरेल्ला, एलेसान्द्रो बास्टोनी, फ्रान्सिस्को एसरवी, माटियो डरमियन र गोलरक्षक आन्द्रे ओनाना रहेका छन् ।

यि दुई टोलीबीच हालसम्म दुई खेलमा प्रतिस्पर्धा हुँदा दुवै टोलीले समान एक खेल जितेका छन् । यि दुई टोली सन् २०११ पछि खेल्न लागेका हुन् । २०११ मा सिटी ३–० ले विजयी रहँदा २०१० मा इन्टर ३–० ले नै विजयी भएको थियो ।