सुबास हुमागाईं, काठमाडौं

सहिद स्मारक ए डिभिजन लिग २०७९ को अन्तिम चरण चलिरहँदा दशरथ रंगशालामा एक समर्थकलाई रंगभेदी टिप्पणी गरेपछि सुरक्षाकर्मीले चेतवानी दिएका छन् । मच्छिन्द्र फुटबल क्लब र मनाङ मर्स्याङ्दी क्लबबीच खेलको दोस्रो हाफमा मनाङका एक समर्थकले मच्छिन्द्रका विदेशी खेलाडीलाई रंगभेदी टिप्पणी गरेपछि खेल केहीबेर रोकिएको थियो ।

दोस्रो हाफको ७८ औं मिनेटमा नाइजेरियन डिफेन्डर ओमोलाजा करीमविरुद्ध भीआइपी प्याराफिटको पहिलो पंक्तिमा बसेका मनाङका समर्थकले उक्त टिप्पणी गरेका थिए । करीमले मुख्य रेफ्री उमेश बिडारी र सहायक रेफ्री माधव खत्रीसमक्ष असन्तुष्टि जनाएका थिए । सोहि समयमा मनाङका प्रशिक्षक विष्णु गुरुङले उक्त समर्थकलाई त्यसो नगर्न भनेका थिए ।

समर्थकले लगातार उक्त शब्द प्रयोग गरेपछि करीमले मैदान छाड्ने प्रयास गरे । मछिन्द्रका केही खेलाडीले उनलाई सम्झाउन खोजे र मच्छिन्द्रका व्यवस्थापक अनिल श्रेष्ठले पनि उनलाई मैदान नछोड्न आग्रह गरे । तर निकै आक्रोशित देखिएका करीमले मैदान छाड्दा मनाङका विदेशी खेलाडी डियान्डु डियाग्नेले उनलाई मैदानबाहिर सँगै गएर स्थिति बुझ्न खोजे । मच्छिन्द्रका बेन्चका प्रशिक्षक र अफिसियलले पुन: आग्रह गरेपछि करीम मैदानभित्र पसे ।

यता मनाङका समर्थक भीआइपी प्याराफिटकै माथिल्लो पंक्तिमा पुगे । त्यसपछि एन्फाका लिग निर्देशक संजिव मिश्रले मैदानमा तैनाथ सुरक्षा गार्ड र प्रहरीको सहयोग लिए । समर्थकले केहि बेर प्रहरीसँग भनाभन गरेपछि प्रहरीले चेतवानी दिएर उनलाई छाड्यो ।

दशरथ रंगशालामा रंगभेदी टिप्पणी भएको यो पहिलो अवसर होइन । यसअघि मच्छिन्द्र र हिमालयन शेर्पाको खेलमा पनि भीआइपी प्याराफिटबाट नै त्यस किसिमको टिप्पणी भएपछि सुरक्षा गार्डले चेतावनी दिएका थिए ।

एन्फाले यस विषयमा कडा कदम नचाल्दा यस किसिमको घटना पटक पटक दोहोरिंदै आएको छ ।