स्पेन (एजेन्सी)– लियोनल मेस्सीले अन्तिम मिनेटमा गोल गरेपछि बार्सिलोना स्पेनिस ला लिगामा आइतबार हारबाट जोगिएको छ । ९० औं मिनेटमा मेस्सीले फ्रिकिकमा गोल गरेपछि भिल्लारियल र बार्सिलोनाले १–१ को बराबरी खेलेका थिए । नयाँ बर्ष २०१७ मा बार्सिलोनाले जित हासिल गर्न सकेको छैन ।

खेलेका पछिल्ला दुवै खेलमा बार्सिलोनाले निराश हुनु पर्यो । यसअघि एथलेटिक बिल्बाओसँग कोपा डे रेको पहिलो लेगमा बार्सिलोना २–१ ले पराजित भएको थियो । आइतबार पहिलो हाफमा खेल नियन्त्रणमा राख्नका वावजुद बार्सिलोनाले खाता खोल्न सकेन । उल्टो ४९ औं मिनेटमा भिल्लारियलले खेलमा अग्रता बनायो । काउन्टर एट्याकमा निकोला सानसोनेले गोल गरेपछि बार्सिलोना खेलमा पछि परेको थियो ।

अन्तिम मिनेटमा मेस्सीले फ्रिकिकमा गोल गरेपछि बार्सिलोना हारबाट जोगिएको थियो । बराबरीपछि जाउमे कोस्टा दोहोरो पहेलो कार्ड पाउँदै मैदान छाडेपछि १० खेलमा भिल्लारियलले खेलको अन्त्य गरेको थियो । बराबरीपछि बार्सिलोना शीर्षस्थानको रियल मड्रिडभन्दा ५ अंकले पछाडी परेको छ । रियालले बार्सिलोनाले भन्दा एक खेल कम खेलेको छ । १६ खेलमा रियलको ४० अंक छ भने दोस्रो स्थानको सेभियाको ३६ र बार्सिलोनाको ३५ अंक छ ।

ला लिगाका अन्य खेलमा सेभियाले रियल सोसिडाडलाई ४–० ले, रियल बेटिसले लेगानेसलाई २–० ले, सेल्टा भिगोले मालागालाई ३–१ ले हरायो भने एथ्लेटिको बिल्बाओ र अल्भेसले गोलरहित बराबरी खेलेका थिए ।