काठमाडौं (हाम्रो खेलकुद) – सहिद स्मारक ए डिभिजन लिग अन्तर्गत अंक तालिकाको पुछारमा रहेको फुटबल क्लब खुमलटारले नेपाल एपिएफ फुटबल क्लबलाई पराजित गरेको छ ।

च्यासल मैदानमा भएको खेलमा विदेशी फरवार्डद्वय मेसुके ओलोमोउ र स्टेफन बिनोङले गोल गर्दा टोली ३-१ को जित निकाल्न सफल रह्यो । पहिलो हाफमै मेसुकेले दुई गोल गर्दै खुमलटारको रेलिगेसनबाट बच्ने सम्भावना जीवित राखेका थिए ।

यस नतिजाले खुमलटार २७ अंकसाथ १३ अ‍ौं स्थानमा पुगेको छ । फ्रेन्ड्स २६ अंकसाथ पुछारमा छ ।

१३ औं मिनेटमा मेसुकेले आफ्नै हाफबाट दर्शनीय गोल गरे । उनले सेन्टरभन्दा पछाडीबाट लिएको लामो फ्रिकिकमा गोलरक्षक राजु नगरकोटीले ध्यान नदिँदा बल सिधै गोल भएको थियो । इन्ज्युरी समयको तेस्रो मिनेटमा उनले अग्रता दोब्बर पारे ।

दोस्रो हाफको ५५ औं मिनेटमा बिनोङले गोल गर्दै खुमलटारलाई ३-० को सहज अवस्थामा पुर्याए । इन्ज्युरी समयमा सनिश श्रेष्ठले गोल गर्दै एपिएफलाई सान्त्वना गोल दिलाए ।

त्यस्तै एन्फा कम्प्लेक्समा भएको विभागीय डर्बीमा नेपाल पुलिस क्लब र त्रिभुवन आर्मी क्लबले अंक बाँडे । दिनेश हेन्जनले दोस्रो मिनेटमा नै आर्मीलाई अग्रता दिलाएका थिए । तर अहमद हिजाजीले ३८ औं मिनेटमा बराबरी गोल फर्काए ।