काठमाडौं (हाम्रो खेलकुद) – सहिद स्मारक ए डिभिजन लिग अन्तर्गत मंगलबार थ्री स्टार क्लबविरुद्ध हुने खेलमा बराबरी मात्र गरेपनि नवप्रवेशी चर्च ब्वाइज युनाइटेड लिग च्याम्पियन बन्ने भएको छ ।

अंक तालिकामा २४ खेलबाट ४४ अंक जोड्दै शीर्ष स्थानमा रहेको चर्च ब्वाइज साविक विजेता मच्छिन्द्र फुटबल क्लबभन्दा ५ अंकले अघि छ । २ खेल बाँकी रहेको अवस्थामा चर्च ब्वाइजले आज हुने खेलमा थ्री स्टारसँग बराबरी मात्र खेलेपनि लिग जित्ने समीकरण बनेको हो । चर्च ब्वाइजले दिउँसो ३ बजे हुने खेलमा थ्री स्टारको सामना गर्दैछ ।

यता थ्री स्टार भने रेलिगेसन क्षेत्रमा खस्ने डरबाट टाढा रहन जित हासिल गर्न चाहन्छ । थ्री स्टारको २४ खेलबाट २८ अंक छ र रेलिगेसन क्षेत्रबाट २ अंक मात्र अघि छ । १३ औं स्थानको फ्रेन्ड्सको २६ र पुछारको खुमलटारको २४ अंक छ ।

आज नै च्यासल मैदानमा ३ बजे हुने खेलमा खुमलटार र एपीएफ भिड्नेछन् । एपिएफले आजको खेलमा खेलमा जित दर्ता गरे रेलिगेसनबाट बच्नेछ । खुमलटारका लागि भने बाँकी दुवै खेल जित्नुपर्ने समीकरण रहेको छ ।

आज एन्फा कम्प्लेक्समा ३ बजे नै हुने खेलमा नेपाल पुलिस क्लब र त्रिभुवन आर्मी क्लब खेल्नेछन् । पुलिस दोस्रो स्थानमा उक्लने प्रयासमा हुँदा आर्मी भने रेलिगेसनको डर हटाउन प्रयासरत रहनेछ । आर्मीले आज जित हासिल गरे अर्को सिजन ए डिभिजनमै रहने पक्का हुनेछ ।

दिनको अन्तिम खेल सातदोबाटो युआ क्लब र जावलाखेल युवा क्लबबीच साँझ ६ बजे हुनेछ । दुवै क्लब अंक तालिकाको शीर्ष ४ मा रहने प्रयासमा छन् । तेस्रो स्थानको जावलाखेलको ३७ अंक छ भने सातदोबाटो ३२ अंकका साथ पाँचौ स्थानमा छ ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिटलगायत सम्पूर्ण जानकारीका लागि यहाँ थिच्नुहोस ।