काठमाडौं (हाम्रो खेलकुद) – मनाङ–मर्स्याङ्दी क्लब र फ्रेन्ड्स क्लबले सहिद स्मारक ‘ए’ डिभिजन लिगमा बराबरी खेल्दै अंक बाँडेका छन् ।

मनाङ र फ्रेन्ड्सले १–१ गोलको बराबरी खेल्दै अंक बाँडेको हो । त्रिपुरेश्वरस्थित दशरथ रंगशालामा आइतबार भएको खेलमा मनाङका लागि निराजन धामीले गोल गर्दा फ्रेन्ड्सका अमित तामाङले बराबरी गोल फर्काए ।

प्रतिस्पर्धात्मक खेलमा दुवै टोलीका गोलरक्षक खेल भरन नै व्यस्त बनेका थिए । ५२औं मिनेटमा निराजन धामीले गोल गर्दै मनाङलाई १–० को अग्रता दिलाए ।

विजय श्रेष्ठको कर्नरमा निराजनको हेडरलाई फ्रेन्ड्सका गोलरक्षकसँगै डिफेन्डरले रोक्ने कुनै चाल नै पाएनन् । ६१औं मिनेटमा सुमित श्रेष्ठको पेनाल्टी बक्सबाहिरको प्रहारलाई फ्रेन्ड्सका गोलरक्षर राजा बाबु थापाले पञ्च गर्दै बचाए ।

८५औं मिनेटमा अमित तामाङले गोल गर्दै फ्रेन्ड्सलाई १–१ गोलको बराबरीमा ल्याए । चेतन कुमार थारुले पेनाल्टी बक्समा उत्तम राईलाई फउल गरेपछि रेफ्री कविन ब्यन्जनकारले फ्रेन्ड्सलाई पेनाल्टी प्रदान गर्दा अमित चुकेनन् ।

यस बराबरीसँगै मनाङ २४ खेलबाट ३२ अंक जोडेर छैटौं स्थानमा छ । पराजित फ्रेन्ड्स ३२ खेलबाट २६ अंक जोडेर १३औं स्थानमा छ ।