काठमाडौं (हाम्रो खेलकुद) – थ्री स्टार क्लब र संकटा क्लबले सहिद स्मारक ‘ए’ डिभिजन लिगमा बराबरी खेल्दै अंक बाँडेका छन् ।

निराशजनक र फितलो बनेको खेलमा थ्री स्टार र संकटाले गोलरहित बराबरी खेल्दै अंक बाँडेका हुन् । दुवै टोलीले पोस्टमा कुनै पनि गतिलो आक्रमण बुन्न सकेन ।

च्यासल रंगशालामा खेलको ४३औं मिनेटमा थ्री स्टारका दीपेश गुरुङको प्रहार बाहिरियो । पहिलो हाफकै इन्ज्युरी समयमा थ्री स्टारले दुई अवसर खेर फल्यो ।

आदित्य शाक्यले पेनाल्टी बक्स बाहिरबाट गरेको प्रहारलाई संकटाका गोलरक्षक टिकेन्द्र सिंह थापाले बचाए । लगत्तै दिपेश गुरुङको प्रहारले पोस्टको दिशा लिन सकेन ।

इन्ज्युरी समयमा अजायी मार्टिन्सको क्रसमा सिफामन्डलाले हेडरमार्फत जाली चुमाएपनि उनी अफसाइड रहँदा गोलले मान्यता पाएन । त्यसपछि थप गोल निस्कन नसक्दा खेल बराबरीमा टुंगियो ।

यस बराबरीसँगै थ्री स्टारले चार खेलपछि अंक जोडेको छ । आर्मीसाग १–१ गोलको बराबरीको नतिजापछि थ्री स्टारले लगातार चार खेलमा हार बेहोरेको थियो ।

यस्तै थ्री स्टार पछिल्लो १२ खेलसम्म जितविहीन बनेको छ । ११औं चरणमा संकटालाई नै ३–० ले पराजित गरेयता थ्री स्टारले जित निकाल्न सकेको छैन । त्यसयताको १२ खेलमा थ्री स्टारले समान ६ बराबरी र ६ हारको नतिजा निकालेको छ ।

बराबरीसँगै रेलिगेसनबाट जोगिन संघर्षरत दुवै टोलीको समान २३ खेलबाट समान २७ अंक पुगेको छ । थ्री स्टार ११औं तथा संकटा १२औं स्थानमा छ । थ्री स्टार र संकटा रेलिगेसन क्षेत्रमा रहेका फ्रेन्ड्स र एफसी खुमलटारभन्दा मात्रै ३ अंकले अघि छ ।