काठमाडौं (हाम्रो खेलकुद) – अखिल नेपाल फुटबल संघ (एन्फा) मा नयाँ कार्यसमिति चयन भएको एक वर्ष अर्को महिना पुग्दैछ । यसबीचमा एन्फाका अधिकांश निर्णाय र निर्णय प्रक्रिया विवादमा परेका छन् ।

एन्फा नेतृत्वले कुनै पनि विवादको अन्त्यका लागि ठोस पहल गरेको पनि देखिन्न ।पछिल्लो पटक कार्यसमितिको आपकालित बैठक सकिएको झण्डै तीन साता पछि एक उपाध्यक्ष र तीन कार्यसमितिले अलग अलग नोट अफ डिसेन्ट बुझाएका छन् ।

वैशाख २५ गते बसेको आपकालिन बैठकले विभिन्न निर्णयसहित सन् २०२३ का लागि ६७ करोड ८ लाख १५ हजार रुपैयाँ बजेट परिमार्जनसहित पारित गरेको थियो । उपाध्यक्ष विराटजंग शाही, सदस्यत्रय भोजराज शाही, रुपेश अभिकारी र रविन्द्र चन्द ठकुरीले अध्यक्ष पंकज नेम्बाङ र महासचिव किरण राईलाई सोमबार नोट अफ डिसेन्ट इमेलमार्फत पठाएका छन् ।

फिफाबाट प्राप्त हुने फिफा फरवार्ड २.० को प्रोजेकट फन्डिङको बजेट अपरेसन शीर्षकमा रहेको बजेट रकमान्तरण गर्न अनुरोध गर्ने निर्णय आकस्मिक बैठकले गरेको थियो । सोही बैठकले फिफा फरवार्ड ३.० प्रोजेक्ट फन्डिङको सिएओ पारित गरि रणनीतिक योजनालाई पुनरावलोकन गर्ने निर्ण पनि गरेको थियो ।

‘बैठकको लिखित निर्णय बैठक सकेको १५ दिनपछि मात्र हामीले प्राप्त गर्यौं । त्यसको ७ दिन भित्र हामीले आफ्नो नोट अफ डिसेन्ट इमेलमार्फत पठाएका हौं, एन्फा सदस्य अधिकारीले भने,‘ बैठकमा पनि वर्षभरीको बजेट विना अध्ययन र छलफल पारित गर्न हुँदैन भन्ने हाम्रो भनाई थियो । त्यसमा २४ घन्टा भित्र प्रास्तावित बजेट पठाउने त्यसमा अध्ययन र छलफल गरेर अघि मात्र निर्णय गर्ने सहमति भएको थियो । तर त्यसको केहि गरिएन एकै पठक दुई सातामा निर्णय भनेर पठाईयो । यसरी हचुवामा गरिएको काममा सहमत हुन सकिन्न त्यस्तैले नोटअफ डिसेन्ट पठाएका हौं ।’

आकस्मिक बैठक सुरु हुनु अघि मात्र आफूहरुले एजेन्डा पाएको अधिकारीले बताए । ‘वर्षभरी हामी कसरी खर्च गछौं । कुन कुन शीर्षकमा फिफा र एफसीबाट बजेट प्राप्त भएको छ । सबैको अध्ययन एउटा आपकालिन बैठकमा गर्न सकिन्न,’ अधिकारीले भने,‘ अनि अर्को तिर एन्फाको विकास बजेटलाई आन्तरिक प्रतियोगितामा खर्च गर्न मिल्दन भन्ने हाम्रो भनाई हो । आन्तरिक प्रतियोगिताका लागि आन्तरिक श्रोत नै परिचालन गर्नुपर्छ भन्ने हो । तर यहाँ अलग अलग शीर्षकमा आएका बजेटलाई नै रकमान्तरण गर्ने प्रयास भइरहेको छ । यो हामीलाई मान्य छैन । ’