काठमाडौं (हाम्रो खेलकुद) – रेलिगेसन जोनमा संघर्ष गरिरहेको फ्रेन्ड्स क्लबलाई पराजित गर्दै विभागीय नेपाल पुलिस क्लब सहिद स्मारक ‘ए’ डिभिजन लिगको चौथो स्थानमा उक्लन सफल भएको छ ।

पुलिसले फ्रेन्ड्सलाई २–१ ले पराजित गर्दै चौथो स्थानमा उक्लन सफल भएको हो । २८ अंक जोडेर नवौं स्थानमा रहेको पुलिसले फ्रेन्ड्समाथिको जितसँगै पाँच स्थान सुधार गरेको हो ।

त्रिपुरेश्वरस्थित दशरथ रंगशालामा सोमबार भएको खेलमा पुलिसको जितमा दुवै गोल अन्जन राईले गोल गरे । फ्रेन्ड्सका बिकास थापाले एक गोल फर्काए ।

खेलको दोस्रो मिनेटमा नै अन्जन राईको गोलबाट पुलिसले सुरुवाती अग्रता लिन सफल भयो । सौजन याख्खा राईको फ्रिकिकमा अन्जन राईले हेडरमार्फत गोल गर्न सफल भए ।

२०औं मिनेटमा विकास थापाले गोल गर्दै खेललाई १–१ गोलको बराबरीमा ल्याए । अमित तामाङको क्रसमा सन्तोष हेमरुनले नभेटेको बललाई विकासले वान टचमा गोल गर्न सफल भएका थिए ।

३५औं मिनेटमा अन्जनले व्यक्तिगत र टोलीका लागि दोस्रो गोल गर्दै पुलिसलाई २–१ को अग्रता दिलाए । यसपटक अन्जनले सौजनकै कर्नरमा हेडरमार्फत गोल गर्न सफल भए ।

अन्जनको हेडर फ्रेन्ड्सका गोलरक्षक विशाल सुनारले बचाउने प्रयास गरेपनि हातबाटै फुस्किदा जाली चुमेको थियो । त्यसपछि थप गोल निस्कन नसक्दा पुलिस विजयी हुन सफल भयो ।

यस जितसँगै चौथो स्थानमा उक्लिएको पुलिसको २२ खेलबाट ३१ अंक पुगेको छ । पराजित फ्रेन्ड्सको २२ खेलबाट २४ अंकसहित १३औं स्थानमा छ । समान २४ अंक नै रहेपनि एफसी खुमलटार पुछारमा छ ।