काठमाडौं (हाम्रो खेलकुद) – मिडफिल्डर आवास लामिछानेको दुई गोल सहयोगमा विभागीय नेपाल एपिएफ फुटबल क्लबले सहिद स्मारक ‘ए’ डिभिजन लिगमा संकटा क्लबलाई पराजित गरेको छ ।

एपिएफले संकटामाथि २–१ को जित दर्ता गरेको हो । संकटाका मनिष डाँगीले एक गोल फर्काए । च्यासल मैदानमा बुधबार भएको खेलको २४औं मिनेटमा आवास लामिछानेले गोल गर्दै एपिएफलाई १–० को अग्रता दिलाए । युवराज खड्काको क्रस क्लियर हुन नसक्दा आवासले वान टचमै फिनिस गरे ।

पहिलो हाफको इन्ज्युरी समयको थप गरिएको तेस्रो मिनेटमा आवासले व्यक्तिगत र टोलीका लागि दोस्रो गोल गर्दै एपिएपको अग्रता दोब्बर पारे । विपन श्रेष्ठले दिएको पासमा उनले एक डिफेन्डरलाई बिट गर्दै पेनाल्टी बक्सबाहिरबाट गरेको प्रहारले जाली चुम्यो ।

५०औं मिनेटमा मनिष डाँगीले गोल गर्दै खेललाई २–१ को स्थितिमा ल्याए । ओनागुना जुनियर एनकेन्गेको क्रसमा अनमार्क रहेका मनिषले हेडरमार्फत गोल गर्न सफल भए । त्यसपछि थप गोल निस्कन नसक्दा एपिएफ विजयी हुन सफल भयो ।

यस जितसँगै एपिएफ २१ खेलबाट २६ अंक जोडेर आठौं स्थानमा उक्लिएको छ । समान २६ अंक नै रहेपनि एनआरटी र हिमालयन शेर्पा छैटौं र सातौं स्थानमा रहँदा एक खेल कम खेलेको थ्री स्टार नवौं स्थानमा झरेको छ । पराजित संकटा २१ खेलबाट २३ अंक जोडेर १२औं स्थानमा छ ।