काठमाडौं (हाम्रो खेलकुद) – विभागीय नेपाल पुलिस क्लब र रेलिगेसन जोनमा रहेको एफसी खुमलटारले सहिद स्मारक ‘ए’ डिभिजन लिगमा सफलता हात पारेको छ ।

पुलिसले पछिल्लो ९ खेलमा जित निकाल्न नसकेको थ्री स्टार क्लबलाई १–० ले पराजित गर्दै रेलिगेसन टार्ने सम्भावना बलियो बनाएको छ ।

सातदोबाटोस्थित एन्फा कम्प्लेक्सको खेल मैदानमा मंगलबार भएको खेलमा पुलिसको जितमा पहिलो हाफमा अहमद हिजाजीले गरेको गोल नै निर्णायक बन्यो । उनले २८औं मिनेटमा गोल गर्न सफल भएका थिए ।

यस जितसँगै पुलिस २० खेलबाट २५ अंक जोडेर आठौं स्थानमा उक्लिएको छ । पराजित थ्री स्टार २० खेलबाट २६ अंक जोडेर छैटौं स्थानमा यथावत छ । संकटालाई ३–० ले पराजित गरेयता थ्री स्टारले ९ खेल खेल्दा जित निकाल्न सकेको छैन । जसमा चार हार र ५ बराबरीको नतिजा छ ।

लिगकै अर्काे खेलमा रेलिगेसन जोनको पुछारमा रहेको एफसी खुमलटारले सातदोबाटो युथ क्लबलाई १–० ले पराजित गरेको छ ।

त्रिपुरेश्वरस्थित दशरथ रंगशालामा मंगलबार भएको खेलमा खुमलटारको जितमा पहिलो हाफमा मेसुके ओलोमोउले गरेको गोल नै निर्णायक बन्यो । उनले ३७औं मिनेटमा गोल गर्न सफल भएका थिए ।

यस जितपछि पनि पुछारमा रहेको खुमलटारले १३औं स्थानमा रहेको फ्रेन्ड्स क्लबसाग अंक बराबरी गरेको छ । खुमलटार २० खेलबाट २१ अंक जोडेर पुछारमा छ । खुमलटारसँग पराजित सातदोबाटो २० खेलबाट २९ अंक जोडेर चौथो स्थानमा यथावत छ ।