काठमाडौं (हाम्रो खेलकुद) – उपाधि होडमा रहेको जावलाखेल युथ क्लब सहिद स्मारक ‘ए’ डिभिजन लिगमा हारबाट जोगिएको छ ।

दुई गोलले पछि परेको स्थिति उल्ट्याएर जावलाखेलले संकटा क्लबसँग २–२ गोलको बराबरी खेल्दै अंक खोस्न सफल भएको हो ।

त्रिपुरेश्वरस्थित दशरथ रंगशालामा आइतबार भएको खेलमा संकटाका आयुष घलान र चन्दन दासले गोल गर्दा जावलाखेलका एनकोटो मासोएबी र समिराज थोकरले बराबरी गोल फर्काए ।

४३औं मिनेटमा आयुष घलानले गोल गर्दै संकटालाई १–० को अग्रता दिलाए । नेल्सनको प्रहार पोलमा लागेर फर्कदा अनमार्क रहेका आयुषले गोल गर्न सफल भए । ७३औं मिनेटमा परिवर्तित खेलाडी चन्दन कुमार दासले गोल गर्दै संकटाको अग्रता दोब्बर पारे ।

डिफेन्स एरियामा छिरिङ लामाबाट बल खोस्दै ६७औं मिनेटमा गणेश हमालको स्थानमा मैदान छिरेका चन्दनले एकल प्रयासमा सुन्दर फिनिस गर्न सफल भए ।

तर, दुई गोलले पछि परेको जावलाखेलले सानदार प्रदर्शन गर्दै खेललाई बराबरीमा ल्याउन सफल भयो । ७७औं मिनेटमा एनकोटो मासोएबीले गोल गर्दै जावलाखेललाई खेलमा फर्काउने संकेत दिए ।

हिसुव थपलियाको क्रसमा अनमार्क रहेका उनले हेडरमार्फत गोल गर्न सफल भए । ८६औं मिनेटमा परिवर्तित खेलाडी समिराज थोकरले गोल गर्दै खेललाई २–२ गोलको बराबरीमा ल्याए ।

५६औं मिनेटमा सुनिल खड्काको स्थानमा मैदान छिरेका उनले संकटाका डिफेन्डरले क्लियर गर्न नसकेको बललाई जाली चुमाउन सफल भए ।

यस बराबरीसँगै जावलाखेलले दोस्रो स्थान गुमाएको छ । तेस्रो स्थानमा झरेको जावलाखेलको २० खेलबाट ३३ अंक छ । शीर्षस्थानको चर्च ब्वाइज युनाइटेडको ३६ तथा दोस्रो स्थानमा रहेको मछिन्द्रको ३४ अंक छ । संकटा २० खेलबाट २३ अंक जोडेर ११औं स्थानमा छ ।