काठमाडौं (हाम्रो खेलकुद) – त्रिभुवन आर्मी क्लबले सहिद स्मारक ए डिभिजन लिग २०७९ मा लगातार दोस्रो पटक चर्च ब्वाइज युनाइटेडलाई पराजित गरेको छ ।

दशरथ रंगशालामा शनिबार आर्मीले १-० को जित दर्ता गरेको हो । जिलेस्पी जंग कार्कीको एकमात्र गोलमा आर्मी ३ अंक हासिल गर्न सफल रहयो । यसअघि पहिलो लेगमा पनि आर्मीले १-० ले जितेको थियो ।

यस हारले चर्च ब्वाइज शीर्षस्थानमा उक्लन सकेन । यता आर्मी भने पाँचौ स्थानमा पुगेको छ । आर्मीको १७ खेलमा ६ जित, ६ बराबरी र ५ हारसहित २४ अंक छ । चर्च ब्वाइज १७ खेलमा ८ जित, ६ बराबरी र ३ हारसहित ३० अंक जोड्दै दोस्रो स्थानमा छ ।

आठौं मिनेटमा सेसेहाङ आङदेम्बेले पेनाल्टी क्षेत्र बाहिरबाट गरेको प्रहार गोलरक्षक एभ्स प्रिसोले पोस्ट पछाडीका लागि पन्च गरिदिए । १९ औं मिनेटमा दिनेश हेन्जनले बायाँ विंगबाट गरेको लामो प्रहारमा प्रिसोले पुन: एकपटक बचाउ गरे । ४१ औं मिनेटमा आर्मीले अर्को अवसर बुन्यो । यसपटक दिनेशको क्रसमा नवयुग श्रेष्ठको हेडर गोलरक्षक प्रिसोले नियन्त्रणमा राखे ।

४४ औं मिनेटमा आर्मीले अग्रता लियो । जितेन्द्र कार्कीले आफ्नै हाफबाट हानेको लामो फ्रिकिकलाई जिलेस्पी जंग कार्कीले हेडरमार्फत गोल गरे । उक्त गोलको केहीबेर अघि गोलरक्षक प्रिसो चोट बोक्न पुगेका थिए र गोल भएपछि उनले मैदान छाडे ।

७१ औं मिनेटमा आशिष चापागाईंको कर्नरमा अनन्त तामाङको हेडर सिधै गोलरक्षक विकेश कुथुको हातमा पुग्यो ।

लिगको अर्को खेलमा मच्छिन्द्रले थ्री स्टार क्लबलाई १-० ले हरायो । युता सुजुकीको गोलमा मच्छिन्द्र विजयी भएको हो ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिट लगायत सम्पूर्ण जानकारीका लागि यहाँ थिच्नुहोस ।