काठमाडौं (हाम्रो खेलकुद) – पहिलो हाफमा २-० ले पछि परेको स्थितिबाट पुनरागमन गर्दै न्यु रोड टिम (एनआरटी) ले सहिद स्मारक ए डिभिजन लिगमा फुटबल क्लब खुमलटारलाई पराजित गरेको छ ।

दशरथ रंगशालामा शुक्रबार एनआरटीले ३-२ को जित दर्ता गर्दै अंक तालिकाको नवौं स्थानमा उक्लियो । एनआरटीको १७ खेलमा ५ जित, ६ बराबर र ६ हारसँगै २१ अंक छ । यता खुमलटार भने १७ खेलमा ५ जित, २ बराबर र १० हारका साथ १७ अंक जोड्दै पुछारमा छ ।

खेलको पहिलो हाफमा एनआरटीले आक्रमणमा निकै अवसर सिर्जना गरेपनि गोल गर्न सकेन । तर काउन्टर अट्याकमा भर परेको खुमलटारले २ गोल गरेको थियो । ३१ औं मिनेटमा गोलरक्षकको लामो बललाई रेजिन सुब्बाले फ्लिक गरेपछि स्टेफान समीरले पेनाल्टी क्षेत्र भित्र लगेर गोल गरे । ३९ औं मिनेटमा राजीव लोप्चनले पेनाल्टी क्षेत्र भित्रबाट तीन डिफेन्डरको बीचबाट गोल गरे ।

दोस्रो हाफमा पनि एनआरटीको आक्रमण कायम रह्यो । तर खुमलटारको खराब गोलरक्षणको फाइदा उठाउँदै एनआरटी खेलमा फर्कियो । ६२ औं मिनेटमा सरोज तामाङको कर्नरमा विक्रम धिमालको हेडर गोलरक्षक देव लिम्बुको हातमा लाग्दै गोल भयो ।

त्यसको २ मिनेटपछि नै एनआरटीले बराबरी गोल फर्कायो । निकोलस सर्ज संगको क्रस गोलरक्षक देवले समाउने प्रयास गर्दा आफ्नै पोस्टभित्र छिराएपछि खेल २-२ को स्थितिमा पुग्यो । त्यसपछि प्रशिक्षक याम गुरुङले देवको स्थानमा गोलरक्षक राजकुमार लिम्बुलाई मैदान छिराए ।

तर ८३ औं मिनेटमा निकोलस संगले एनआरटीलाई अग्रता दिलाए । दिपेश आले मगरको उत्कृष्ट कटब्याकमा संगले फस्ट बारमा गरेको प्रहार गोल भयो ।

त्यसअघि रंगशालामा पुलिसले संकटालाई २-१ ले हराउँदा मनाङ मर्स्याङ्दी र हिमालयन शेर्पा १-१ को बराबरीमा रोकिए ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिट लगायत सम्पूर्ण जानकारीका लागि यहाँ थिच्नुहोस ।