काठमाडौं (हाम्रो खेलकुद) – भारतीय महिला लिग (आइडब्ल्यूएल) मा नेपाली राष्ट्रिय टोलीकी फरवार्ड रेखा पौडेल आबद्ध स्पोर्टस उडिसाले जित हासिल गरेको छ । मंगलबार भएको खेलमा स्पोर्टस उडिसाले इस्ट बंगाल एफसीलाई २–१ ले हराउँदा रेखाले पनि गोल गरेकी थिइन् ।

रेखाको गोलबाट नै उडिसाले अग्रता लिएको थियो । पहिलो हाफ गोलरहित बराबरीमा टुंगिएको खेलको ६० औं मिनेटमा रेखा गोल गर्न सफल भएकी हुन् । मौसमी मुर्मुले ६३ औं मिनेटमा इस्ट बंगालका लागि गोल फर्काएकी थिइन् ।बराबरीतर्फ उन्मुख खेलको इन्ज्युरी समयको चौथो मिनेटमा रितु देवीले गोल गर्दै स्पोर्टस उडिसालाई जित दिलाइन् ।

पाँचौं खेलमा चौथो जितपछि १२ अंकका साथ उडिसा समूह बीको अंकतालिकाको दोस्रो स्थानमा उक्लेको छ । राष्ट्रिय टोलीका दुई खेलाडी सरु लिम्बु र रनुका नगरकोटे आबद्ध किकस्टार्ट एफसीलाई पछि पार्दै उडिसा दोस्रो स्थानमा उक्लेको हो । यद्दपी अंक भने दुवै टोलीको समान छ ।

राष्ट्रिय टोलीकी कप्तान एवंम् गोलकिपर एन्जिला तुम्बापो सुब्बा सम्मिलित सेथु भने १५ अंकका साथ समूह बीको अंकतालिकाको शीर्षस्थानमा छ । समूह एमा १३ अंकसहित राष्ट्रिय टोलीकी फरवार्ड सावित्रा भण्डारी साम्बा आबद्ध गोकुलम केरेला एफसी शीर्षस्थानमा छ ।