काठमाडौं (हाम्रो खेलकुद)– नेपाली राष्ट्रिय महिला फुटबल टोलीका दुई मिडफिल्डर सरु लिम्बु र रेनुका नगरकोटे आबद्ध किकस्टार्ट एफसीले भारतीय महिला लिग (आइडब्ल्यूएल) मा जित हासिल गरेको छ ।

किकस्टार्टले आइतबार बिहान भएको खेलमा सेल्टिक क्विन्स एफसीलाई ५–० ले हराएको छ । टोलीका जितमा सरु र रेनुका दुवैले गोल गरेका थिए । सरुले यसअघिका खेलमा गोल गरकी थिइन् भने जारी लिगमा रेनुकाको त्यो पहिलो गोल हो । दोस्रो हाफमा मैदान प्रवेश गरेकी रेनुकाले ५२ औं मिनेटमा गोल गरेकी थिइन् ।

त्यसअघि किओको एलिथावेथले ३३ औं मिनेटमा टोलीका लागि पहिलो गोल गरेकी थिइन् । देभनेता रोयले ३५ औं र लाइस्राम बिबिचा देवीले ४३ औं मिनेटमा गोल गरेकी थिइन् । टोलीका लागि अन्तिम गोल सरुले ६६ औं मिनेटमा गरेकी थिइन् । अर्को खेलमा राष्ट्रिय टोलीकी अनिता बस्नेत आबद्ध लर्डस् एफए कोची ओडिसा एफसीसँग ५–० ले पराजित भएको थियो ।

४ खेलका चौथो जितका साथ किकस्टार्ट १२ अंकका साथ तेस्रो स्थानमा छ । समान अंकका साथ ओडिसा दोस्रो स्थानमा तथा नेपाली राष्ट्रिय महिला फुटबल टोलीकी कप्तान एवंम गोलकिपर एन्जिला तुम्बापो सुब्बा सम्मिलित आबद्ध सेथु १५ अंकसहित शीर्षस्थानमा छ । लर्डस ३ अंकका साथ छैटौं स्थानमा छ ।

सेथुले आइतबार बिहान भएको खेलमा सेन्ट्रल रिजर्भ पुलिस फोर्स फुटबल क्लबलाई ५–० ले हराउँदै जारी लिगमा लगातार पाँचौं जित हासिल गरेको थियो । राष्ट्रिय टोलीकी फरवार्ड सावित्रा भण्डारी साम्बा आबद्ध गोकुलम केरेला एफसी १३ अंकसहित समूह एको शीर्षस्थानमा रहेको छ ।