काठमाडौं (हाम्रो खेलकुद) – नेपाली राष्ट्रिय महिला फुटबल टोलीकी फरवार्ड सावित्रा भण्डारी सम्बा आबद्ध गोकुलम केरेला एफसीले भारतीय महिला लिग (आइडब्ल्यूएल) मा शनिबार सानदार जित निकालेको छ ।

काहानी फुटबल क्लबलाई १४–१ ले हराउँदा सावित्राले ४ गोल गरिन् । टोलीको पाँचौं खेलमा सावित्राले ४ वा सो भन्दा बढी गोल गरेको यो तेस्रो पटक हो । अघिल्लो खेलमा गोलरहित बराबरीमा रोकिएको टोलीका लागि सावित्राले पहिलो खेलमा ५, दोस्रो खेलमा ४ र तेस्रो खेलमा २ गोल गरेकी थिइन् ।

५ खेलमा सावित्राको १५ गोल पुगेको छ । जारी लिगमा उनी सर्वाधिक गोलकर्ताको सुचीमा शीर्षस्थानमा छिन् । सेथुकी काजोल डिसोजा ८ गोलका साथ दोस्रो स्थानमा छिन् । शनिबारको जितमा केराका लागि सन्धिया रंगनाथनले ५ गोल गरेकी थिइन् । कलानीकी एक खेलाडीले आत्मघाती गोल गरेको खेलमा हेमम सिल्की देवी, इन्दुमाथी काथिरेसन, भिभियन कोनाडु एडजी, लिटोङबाम आहालाता देवीले समान १ गोल गरेकी थिइन् ।

पहिलो गोल २० औं मिनेटमा गरेकी सावित्राले दोस्रो गोल ७६ औं मिनेटमा र इन्ज्युरी समयको चौथो मिनेटमा गोल थप्दै ह्याट्रिक पूरा गरेकी थिइन् । उनको व्यक्तिगत चौथो गोल इन्ज्युरी समयको सातौं मिनेटमा गरेकी थिइन् । ५ खेलमा १३ अंकसहित गोकुलम समूह एको अंकसहित शीर्षस्थानमा र १० अंकसहित १० मुम्बई नाइट एफसी दोस्रो स्थानमा छ । समूह बीमा १२ अंकसहित राष्ट्रिय टोलीकी कप्तान एवंम् गोलकिपर एन्जिला तुम्बापो सुब्बा आबद्ध सेथु शीर्षस्थानमा छ ।