काठमाडौं (हाम्रो खेलकुद)– नेपाली राष्ट्रिय महिला फुटबल टोलीकी कप्तान एवंम गोलकिपर एन्जिला तुम्बापो सुब्बा सम्मिलित सेथुले भारतीय महिला लिग (आइडब्ल्यूएल) मा दोस्रो जित हासिल गरेको छ ।

आइतबार भएको खेलमा सुथुले राष्ट्रिय टोलीकी अर्की सदस्य अनिता बस्नेत सम्मिलित लर्डस् एफए कोचीलाई ४–१ ले हराएको थियो । एन्जिलाले पहिलो रोजाईमा खेल्दा अनिताले भने खेल्न मौका पाइनन् ।सेथुको जितमा काजोल डिबसुजाले २ गोल गरेकी थिइन् ।

सुमाती कुमारीको गोलमा सेथुले ४६ औं मिनेटमा अग्रता बनाएको थियो । काजोल ५८ औं मिनेटमा र नौरिम प्रियंका देवीले ६९ औंमा गोल गरेपछि टोली ३–० ले अघि लागेको थियो । ८५ औं मिनेटमा काजोलले अर्को गोल थपिन् । इन्ज्युरी समयमा लर्डस्का लागि काथलिनले गोल फर्काएकी थिइन् ।

यसअघि आइतबार नै भएको खेलमा राष्ट्रिय टोलीकी दुई मिडफिल्डर सरु लिम्बु र रेनुका नगरकोटे सम्मिलित किकस्टार एफसी कर्नाटकले लिगमा पहिलो जित हासिल गरेको छ । बिककस्टारले ओडिसा एफसीलाई २–० ले हराएको थियो ।समूह बीमा इस्टर्न र सेथुको समान ६ अंक पुगेको छ । किकस्टार ३ अंकसहित पाँचौं स्थानमा छ ।

समूह एमा भने राष्ट्रिय टोलीकी सावित्रा भण्डारी सम्मलित गोकुलम केरेला एफसी ६ अंकका साथ शीर्षस्थानमा रहेको छ । सावित्राले गोकुलमको पहिलो जितमा ५ र दोस्रो जितमा ४ गोल गरेकी थिइन् । लिगमा समावेश १६ टोलीलाई दुई समूहमा विभाजन गरि राउन्ड रोविन लिगका आधारमा प्रतियोगिता भइरहेको छ । यसपटक भारतीय लिगमा नेपाली राष्ट्रिय टोलीका ६ खेलाडी सुरु र रेनुका एउटै र बाँकी अलग अलग क्लबबाट खेलिरहेका छन् ।