काठमाडौं (हाम्रो खेलकुद) – नेपाली राष्ट्रिय महिला फुटबल टोलीकी फरवार्ड सावित्रा भण्डारी साम्बा गोकुलम करेला एफसीको दोस्रो खेलमा पनि चम्केकी छिन् । सावित्राले ४ गोल गरेको खेलमा गोकुलमले शनिबार भारतीय महिला लिग (आइडब्लुएल) मा स्पोर्टस उडिसालाई ८–१ ले हराएको छ ।

यसअघि बुधबार भएको खेलमा सावित्राले एक्लैले ५ गोल गरेको खेलमा गोकुलमले इस्ट बंगाललाई ८–२ ले हराएको थियो । त्यो २२ मिनेट भित्रै ह्याट्रिक गरेकी सावित्राले दोस्रो खेलमा दोस्रो हाफमा ह्याट्रिक पूरा गरेकी थिइन् । जारी लिगमा सावित्राको गोल संख्या ९ पुगिसकेको छ ।

शनिबार सावित्राले सातौं मिनेटमा पहिलो गोल गरेकी थिइन् । उडिसाकी सुमित्राले १२ औं मिनेटमा गोल गर्दै खेललाई बराबरीमा पुर्याएकी थिइन् । उडिसाबाट नेपाली राष्ट्रिय टोलीकी रेखा पौडेल खेल्दै आएकी छिन् ।

भिभियनले २८ औं मिनेटमा गोल गरेपछि गोकुलमले दोस्रो पटक अग्रता बनाएको थियो । ग्रेसले ४३ औं मिनेटमा गोल गर्दा गोकुलमले पहिलो हाफमा ३–१ को अग्रता बनाएको थियो । ६२ औं मिनेटमा सावित्राले दोस्रो गोल गरिन् भने लगत्तै ६३ औं मिनेटमा अर्को गोल थप्दै लगातार दोस्रो खेलमा ह्याट्रिक पूरा गरेकी थिइन् ।

सिकीले गोकुलमका लागि ७० औं मिनेटमा गोल गरिन् भने सावित्राले ७९ औं मिनेटमा अर्को गोल थपिन् । भिभियनले ८६ औं मिनेटमा गोल गर्दै गोलअन्तरलाई बढाएकी थिइन् । पछिल्लो पटक पनि गोकुलमलाई लिग च्याम्पियन बनाउन महत्वपूर्ण भूमिका खेलेकी सावित्रा त्यति बेला सर्वाधिक गोलकर्ता समेत बनेकी थिइन् ।

लिगमा शुक्रबार नेपाली राष्ट्रिय टोलीकी कप्तान तथा गोलकिपर एन्जिला तुम्बापो सुब्बा सम्मलित सेथुले चर्चिल ब्रर्दश एफसीलाई ६–० ले हराएको थियो । एन्जिला पहिलो रोजाईमा खेलकी थिइन् । राष्ट्रिय टोलीकै सुरु लिम्बु र रेनुका नगरकोटे सम्मलित किक स्टार्ट इस्टर्न स्पोर्टिङसँग १–० ले पराजित भएको थियो ।

सुरु पहिलो रोजाईमा परेकी थिइन् भने रेनुकाले परिवर्तित खेलाडीका रुपमा खेलेकी थिइन् । राष्ट्रिय टोलीकी अर्की सदस्य अनिता बस्नेत सम्मलित लर्डस् एफएले सेल्टिक क्विन्स एफसीलाई ४–० ले हराएको थियो । अनिताले परिवर्तित खेलाडीमा खेलेकी थिइन् ।