काठमाडौं (हाम्रो खेलकुद) – थ्री स्टार क्लब र मछिन्द्र फुटबल क्लबले सहिद स्मारक ‘ए’ डिभिजन लिगमा बराबरी खेल्दै अंक बाँडेका छन् । थ्री स्टार र मछिन्द्रले गोलरहित बराबरी खेल्दै अंक बाँडेका हुन् ।

त्रिपुरेश्वरस्थित दशरथ रंगशालामा बुधबार भएको प्रतिस्पर्धात्मक खेलमा दुवै टोलीले गोलका केही अवसर सिर्जना गरेपनि सदुपयोग गर्न नसक्दा खेल बराबरीमा टुंगियो ।

खेलको ४४औं मिनेटमा ओलावाले ओलाडिपो अफिजको पासमा चेन्चो ग्याल्सेनको प्रहार क्रसबारमा लागेर फर्कदा मछिन्द्र अग्रता लिनबाट चुक्यो । ४७औं मिनेटमा सन्तोष साहुखलको प्रहारले पोस्टको दिशा लिन सकेन ।

६८औं मिनेटमा थ्री स्टारले गोल गरेपनि रेफ्री प्रज्वल क्षेत्रीले गोललाई मान्यता दिएन । लाकेन लिम्बुको प्रहारलाई अफसाइड पोजिसनमा रहेका अजायी मार्टिन्सले फाइनल टच दिएका थिए ।

७०औं मिनेटमा निसेन सुब्बाको क्रसमा ओलावालेको हेडरलाई महेन्द्र कार्कीले हेडमार्फत नै क्लियर गदै थ्री स्टारको संकट टारे । लगत्तै अर्काेतर्फ सन्तोष साहुखलको पासमा दिपेश गुरुङले पेनालटी बक्सभित्र सुवर्ण अवसर पाएपनि उनको प्रहार आकासिदा थ्री स्टार अग्रता लिनबाट चुक्यो ।

८४औं मिनेटमा चेन्चो ग्याल्सेनको फ्रिकिकलाई थ्री स्टारका गोलरक्षक मोहम्मद ताहले पञ्च गर्दै बचाए । इन्ज्युरी समयको थप गरिएको पाँचौ मिनेटमा सौरभ लिम्बुको प्रहारलाई गोलरक्षक ताहले पञ्च गर्दै बचाए ।

यस बराबरीसँगै दोस्रो स्थानमा रहेको थ्री स्टारको १२ खेलबाट २२ अंक पुगेको छ । मछिन्द्रको १२ खेलबाट १७ अंक पुगेको छ ।