काठमाडौं (हाम्रो खेलकुद) – अखिल नेपाल फुटबल संघ (एन्फा) ले एकेडेमी फि नतिर्दा तीन विभागीय टोलीमध्य नेपाल पुलिस क्लब र नेपाल एपिएफ क्लबको स्कुलमा अध्ययनरत विद्यार्थी एकेडेमी र विद्यालयबाट निकालिएका छन् ।

एन्फाले २०७७ सालमा खुला छनोटबाट तीन विभाग पुलिस, आर्मी र एपिएफलाई पूर्ण छात्रवृत्तिमा ७-७ खेलाडी उपलब्ध गराएको थियो । आंशिक छात्रवृत्तिमा पनि ७-७ खेलाडी रहेका थिए । पूर्ण छात्रवृत्तिमा रहेका खेलाडीको स्कुल खर्च एन्फाले उठाउने सहमति अनुसार राष्ट्रव्यापी रुपमा खेलाडी छनोट पनि भयो । तर पछिल्लो दुई वर्षको रकम नबुझाएको भन्दै पुलिस र एपिएफ स्कुलले छात्रवृत्ति पाएका विद्यार्थीलाई वैशाखदेखि स्कुल प्रवेश गर्न दिएको छैन ।

नयाँ सेसन सुरु भएसँगै अन्य विद्यार्थी स्कुल जाँदा निकालिएका एकेडेमीका खेलाडी भने एन्फा परिसरमा देखिन्छन् । आफ्नो आमा बुबाको साथमा एन्फासँग छलफल गर्न आएका उनीहरुले वैशाख ५ गतेदेखि अध्यक्षको भेट्ने आश्वासनबाहेक केहि पाएका छैनन् । सोमबार एन्फा कम्प्लेक्स परिसरमा उनीहरु अध्यक्षकै पर्खाइमा थिए, तर भेट्ने अवसर भने पाएका छैनन् ।

२०७८ सालमा भर्ना भएका विद्यार्थीले २०७९ सालमा पनि पढे । यसबीचमा एन्फाले केहि रकम तिरेको भएपनि लामो समयदेखि शुल्क नतिर्दा स्कुलले नयाँ सेसनमा खेलाडीलाई स्कुल पस्न दिएन । अर्को स्कुल जाने विकल्पका लागि आवश्यक मार्कसिट पनि स्कुलले बाँकी पैसा नतिर्दासम्म दिन मानिरहेको छैन । यतिमात्र होइन, नयाँ सेसन सुरु भइसकेकोले अब अरु स्कुल खोज्न पनि अभिभावकलाई सहज छैन ।

प्रशान्त मोक्तान राष्ट्रव्यापी छनोटमार्फत २ वर्षअघि नेपाल पुलिसको साँगास्थित स्कुलको ७ कक्षामा भर्ना भएका थिए । उनले गत वर्ष आइजीपी कपमा पुलिसको टोलीबाट खेलेका पनि थिए । तर ९ कक्षाका लागि स्कुल जानुपर्ने समय उनी एन्फा परिसरमा हुन्छन् । उनका बुबा तिलक लामा आफ्नो छोराको भविष्यका लागि एन्फा धाइरहेका छन् ।

‘हामीलाई ५ वर्षका लागि छात्रवृत्ति भनिएको थियो । तर अहिले स्कुलले विद्यार्थीको बाँकी रकम नतिरेसम्म भित्र छिर्न दिएको छैन । अब अरु विद्यार्थी स्कुल गएका छन्, आफ्नो छोरालाई के भन्ने हामीसँग केहि उत्तर छैन । एन्फा आएको यतिका दिन हुँदा केहि जानकारी पाएका छैनौं । अध्यक्षले भेट्ने भनेपनि समय दिन सक्नुभएको छैन,’ लामाले दुख पोखे ।

यस वर्ष एसइई दिनुपर्ने विद्यार्थी पनि एन्फा बाहिर देखिन्छन् । उनीसँगै पुलिस र एपीएफमा छात्रवृत्ति पाएका ७-७ जना स्कुल जान पाइरहेका छैनन् । आर्मीले भने आन्तरिक स्रोतबाट नै एन्फाले पैसा नतिरेपनि छात्रवृत्ति प्राप्त खेलाडीलाई एकेडेमी र स्कुलमा राखेर पढाइरहेको छ ।

एन्फा महासचिव किरण राई भने यसबारे परिवारलाई पहिला नै जानकारी दिइएको बताउँछन् । ‘हामी अहिले फिफाको कन्ट्रोल फन्डीङमा छौं । हामीले केहि महिनाअघि कार्यसमिति बैठकबाट यो एकेडमी संरचनालाई अघि बढाउन आर्थिक रुपमा सम्भव नभएको भन्दै जानकारी गराइसकेका छौं । २०७९ सालको चैत्रसम्म हामीले पढाइ पूरा गर्न दिने र त्यसबेलासम्मको बाँकी रकम तिर्नेबारे पनि पत्राचार गरिसकेको अवस्था छ,’ उनले भने ।

एन्फाका पूर्व अध्यक्ष कर्मा छिरिङ शेर्पाले आफ्नो कार्यकालमा युवा परियोजना अन्तर्गत यो कार्यक्रम अघि बढाएको बताए । ‘हामीले एन्फा एकेडेमीमा खर्च बढि भएपछि विभागलाई प्रयोग गरेर अझ प्रभावकारी संचालन गर्न यो योजना सारेका थियौं । यसले आर्थिक भार‌ पनि कम भएको थियो । खर्च फिफा र एएफसीको युवा शीर्षकमा बजेट मिलाएका थियौं,’ उनले भने ।

पुरानो एन्फाको खर्च कटौती गर्दै युवा फुटबल बलियो बनाउने योजनालाई नयाँ कार्यसमितिले आर्थिक भार भएको र प्रभावकारी नभएको भन्दै एकेडेमी रोकेको छ । खेलाडी नयाँ सेसनमा विद्यालय जान पाएका छैनन् । बिरलै देखिने यस्तो योजनाको असफलताले खेलाडीमा भने असर परेको छ ।

पुलिसमा पूर्ण छात्रवृत्ति पाएका खेलाडी :

प्रशान्त मोक्तान, निश्चल थामी, लक्ष्मण थामी, दिप्सन परियार, मिजास श्रेष्ठम भुपेश लामा, पर्वत मगर

एपिएफमा पूर्ण छात्रवृत्ति पाएका खेलाडी :

विवेक पश्रचिमा थारु, डेटिन राई, तेन्जिङ शेर्पा, अनुज श्रेष्ठ, उत्सव थापा, डम्बर बहादुर विश्वकर्मा, विवेक विक