काठमाडौं (हाम्रो खेलकुद)– फ्रेन्ड्स क्लबले सहिद स्मारक ए डिभिजन लिगमा लगातार दोस्रो जित निकालेको छ । अघिल्लो खेलमा हिमालयन शेर्पा क्लबमाथि ६–० को विजय प्राप्त गरेको फ्रेन्ड्सले बुधबार दशरथ रंगशलामा संकटा क्लबलाई ३–१ ले हराएको थियो ।

फ्रेन्ड्सलाई जित दिलाउन कप्तान प्रकाश बुढाथोकी, टोरिक जेब्रिन र राफिक एमिनुलेब गोल गरे । संकटाका लागि जुनियर एनकेनगुएनलेब गोल गरेका थिए । चाथो मिनेटमा प्रकाशको गोलबाट फ्रेन्ड्सले अग्रता ,लिएको थियो । नवौं मिनेटमा जुनियरको गोलबाट संकटा खेलमा फर्कियो । तर, २५ औं मिनेटमा टोरिककको गोलमा फेन्ड्सले दोस्रो पटक अग्रता बनायो ।

दोस्रो हाफमा पनि खेलमा पकड बनाएको फ्रेन्ड्सका लागि राफिकले इन्जयुरी समयमा गोल थपे र टोलीको जित निश्चित गरे । १० खेलमा तेस्रो जित निकालेपछि फ्रेन्ड्स ११ अंकका साथ दसौं स्थानमा उक्लेको छ । १५ अंकका साथ संकटा सातौं स्थानमा छ ।

बुधबार कै अन्य खेलमा जावलाखेल युथ क्लब र एपिएफ क्लब विजयी भएका छन् । च्यासल फुटबल मैदानमा शीर्षस्थानको जावलाखेलले दबाबमा रहेको नेपाल पुलिस क्लबलाई ६–१ ले हरायो । अर्को विभागिय टोली एपिएफले भने दशरथ रंगशालामा लिगको साविक विजेता मछिन्द्र क्लबलाई १–० ले हराएको छ । जावलाखेल २० अंकका साथ शीर्षस्थानमा मजबुत बनेको छ । ५ अंक सहित पुलिस अंकतालिको पुछारमा छ । एपिएफ (१४ अंक) आठौं र मछिन्द्र (१३ अंक) नवौं स्थानमा छ ।