काठमाडौं (हाम्रो खेलकुद) – विभागीय नेपाल एपिएफ फुटबल क्लबले सहिद स्मारक ‘ए’ डिभिजन लिगमा साविक विजेता मछिन्द्र फुटबल क्लबलाई पराजित गरेको छ ।

अर्मान्ड विडोमको निर्णायक गोलमा एपिएफले मछिन्द्रलाई १–० ले पराजित गरेको हो । अर्मान्डले पहिलो हाफमा गरेको गोल नै एपिएफको जितमा निर्णायक बन्यो । त्रपुरेश्वरस्थित दशरथ रंगशालामा बुधबार भएको खेलमा अर्मान्डले ३९औं मिनेटमा गोल गर्न सफल भएका थिए ।

खेलको २०औं मिनेटमा एडमा डोम्वियाको हेडर पासमा एब्डोउ रमानीको हेडरलाई गोलरक्षक तथा कप्तान विशाल श्रेष्ठले सहजै नियन्त्रणमा लिए । २३औं मिनेटमा विजय भुजेलको प्रहार पोस्टमाथि आकासिदा मछिन्द्र अग्रता लिनबाट चुक्यो ।

२८औं मिनेटमा चेन्चो ग्याल्सेनको क्रसमा विमल घर्ती मगरको भली प्रहार आकासियो । ३१औं मिनेटमा चेन्चोको पेनाल्टी बक्स बाहिरको सशक्त प्रहार थोरै बाहिरिदा मछिन्द्रले अग्रता लिन सकेन ।

३३औं मिनेटमा विमल हुँदै चेन्चोको हेडर पासमा आन्द्रेस नियाको सिक्स यार्ड बक्स भित्रको प्रहार पहिलो बार च्याप्दै बाहिरिदा मछिन्द्रले अग्रता लिने सुवर्ण अवसर गुमायो ।

३९औं मिनेटमा अर्मान्ड विडोमले गोल गर्दै एपिएफलाई १–० को अग्रता दिलाए । कप्तान नविन लामाको चलाखीपूर्ण पासमा अर्माण्डले अफसाइड बिट ट्याप गर्दै दुई डिफेन्डरलाई छलाएर दोस्रो बारतर्फ गोल गर्न सफल भए ।

४१औं मिनेटमा विजय भुजेलको प्रहारलाई गोलरक्षक र डिफेन्डरले ब्लक गर्दा मछिन्द्र बराबरीबाट चुक्यो । ४४औं मिनेटमा आन्द्रेस नियाको क्रस पासमा विमलको हेडर क्रसबाट थोरै बाहिरियो ।

५०औं मिनेटमा अर्मान्डले वान भर्सेस वानको स्थितिमा गरेको प्रहार आकासिदा एर्पि.एफ अग्रता दोब्बर पार्नबाट चुक्यो । ५८औं मिनेटमा आन्द्रेस नियाको कर्नरमा चेन्चोको हेडर सदुपयोग हुन सकेन ।

यस जितसँगै एपिएफ १० खेलबाट १४ अंक जोडेर आठौं स्थानमा उक्लिएको छ । पराजित मछिन्द्र १३ अंक जोडेर नवौं स्थानमा झरेको छ ।