काठमाडौं (हाम्रो खेलकुद) – मनाङ मर्स्याङ्दी क्लबलाई हराउँदै त्रिभुवन आर्मी क्लब सहिद स्मारक ए डिभिजन लिगको चौथो स्थानमा उक्लिएको छ ।

दशरथ रंगशालामा सुदिल राईले दोस्रो हाफमा गरेको गोलमा आर्मी १-० को जित दर्ता गर्न सफल भयो । मनाङ लिगमा लगातार तेस्रो हार बेहोर्दै अंक तालिकाको पाँचौ स्थानमा झरेको छ । आर्मी र मनाङसहित पाँच टोलीको समान १५-१५ अंक हुँदा एक अर्काबीच हेड टु हेडको आधारमा स्थान निर्धारण भएको हो । जावलाखेल र सातदोबाटो समान १७ अंकका साथ क्रमश: शीर्ष दुई स्थानमा छन् ।

खेलको दोस्रो मिनेटमा नै नवयुग श्रेष्ठले गोल गर्ने सुवर्ण अवसर खेर फाल्दा आर्मी अग्रता लिनबाट चुक्यो । आशिष गुरुङले पेनाल्टी बक्समा गल्ती गरेको बललाई जगजित श्रेष्ठले खोस्दै दिएको क्रसमा गोलरक्षक तथा कप्तान दीप कार्की बिट भएपनि नवयुग श्रेष्ठले सिक्स यार्ड बक्सभित्रबाट गोल गर्न सकेनन् ।

२७ औं कोफी टिमोथी कुडोको फितलो प्रहारलाई आर्मीका गोलरक्षक विकेश कुथुले सहजै नियन्त्रणमा लिए । ६० औं मिनेटमा दिनेश हेन्जनको प्रहारलाई गोलरक्षक दीप कार्कीले डाइभ दिदै बचाए । लगत्तै जगजित श्रेष्ठको प्रहार आकासियो । ६३औं मिनेटमा जगजित श्रेष्ठको कर्नरमा दीपक गुरुङको हेडर गोलरक्षक दीपको हातमा लाग्दै बाहिरिदा आर्मीले अग्रता लिन सकेन ।

७५औं मिनेटमा सुदिल राईले गोल गर्दै आर्मीलाई १–० को अग्रता दिलाए । जगजित श्रेष्ठको फ्रिकिकलाई मनाङका डिफेन्डर जीवन गुरुङले ६ यार्ड बक्सभित्र क्लियर गर्न नसक्दा सुदिल गोल गर्न सफल भए ।

८२ औं मिनेटमा मनाङले बराबरी गर्ने अवसर पायो । गोलरक्षक विकेश कुथु अघि आएको अवस्थामा कोफी कोउडुले गरेको प्रहार निकै ढिलो भएको थियो । इन्ज्युरी समयमा सुदिलले अग्रता दोब्बर पार्ने अवसर गुमाए । जगजितको सुन्दर पासमा सुदिलले ६ यार्ड बक्स भित्र सटिक प्रहार गर्न नसक्दा गोलरक्षक दीपले सहजै बचाए ।

त्यसअघि दिनको पहिलो खेलमा न्यु रोड टिम (एनआरटी) ले फुटबल क्लब खुमलटारलाई ३-१ ले हराएको थियो । विस्तृतमा यहाँ