काठमाडौं (हाम्रो खेलकुद) – न्युरोड टिम (एनआरटी) सहिद स्मारक ‘ए’ डिभिजन लिगमा एफसी खुमलटारलाई पराजित गर्दै रेलिगेसन क्षेत्र छाडेको छ ।

दशरथ रंगशालामा मंगलबार भएको खेलमा एनआरटीले खुमलटारलाई ३–१ ले पराजित गर्दै रेलिगेसन क्षेत्र छाडेको हो ।एनआरटीको जितमा सरोज तामाङ, सन्जिव विष्ट र मोहित गुरुङले गोल गरे । खुमलटारका श्याम मुुर्मुले एक गोल फर्काए ।

सबै चार गोल दोस्रो हाफमा भएको थियो । निराशजनक बनेको पहिलो हाफमा एनआरटीका सरोज तामाङ गोलको दुई अवसर खेर फालेका थिए । ५१औं मिनेटमा स्टेफन समिर विनोङको प्रहारलाई एनआरटीका गोलरक्षक पुजन होनाले सहजै नियन्त्रणमा लिए ।

५७औं मिनेटमा मनिष थापाको क्रसमा अभिषेक लिम्बुको हेडरलाई गोलरक्षक पुजन होनाले उत्कृष्ट बचाउ गर्दै एनआरटीलाई खेलमा कायम राखे । ६५औं मिनेटमा सरोज तामाङले गोल गर्दै एनआरटीलाई १–० को अग्रता दिलाए । सुसान श्रेष्ठले दिएको क्रसलाई अनमार्क रहेका सरोजले हेडरमार्फत गोल गर्न सफल भए ।

८२औं मिनेटमा सन्जिव विष्टले गोल गर्दै एनआरटीलाई २–० को अग्रता दिलाए । जिन एनिसेट एमबोउमीको क्लियरेन्सलाई कृतिश रन्त छुन्जुले नियन्त्रणमा लिदै दुई डिफेन्डरलाई बिट गर्दै दिएको पासमा रोशन दोङले क्लियर गर्न नसकेको बलाई सन्जिवले सहजै गोल गर्न सफल भए ।

८५औं मिनेटमा परिवर्तित खेलाडी मोहित गुरुङले गोल गर्दै एनआरटीलाई ३–० ले अघि बढाए । कृतिशको पासमा अनमार्क रहेका मोहितले गोलरक्षक देव लिम्वुलाई बिट गर्दै गोल गर्न सफल भए ।

९०औं मिनेटमा परिवर्तित खेलाडी श्याम मुर्मुले जय गुरुङको पासमा गोल गर्दै खेललााई ३–१ को स्थितिमा ल्याएपनि त्यसपछि थप गोल निस्कन नसक्दा एनआरटी विजयी हुन सफल भयो ।

एनआरटी १० खेलबाट १० अंक जोडेर १०औं स्थानमा उक्लिएको छ । पराजित खुमलटार १० खेलबाट १० अंक जोडेर ११औं स्थानमा झरेको छ ।