काठमाडौं (हाम्रो खेलकुद) – रेलिगेसन जोनमा रहेको फ्रेन्ड्स क्लबले सहिद स्मारक ‘ए’ डिभिजन लिगमा हिमालयन शेर्पा क्लबमाथि सानदार जित हात पारेको छ ।

एन्फा कम्प्लेक्समा सोमबार भएको खेलमा फ्रेन्ड्सले शेर्पामाथि ६–० को सानदार जित दर्ता गर्दै लिगमा दोस्रो जित दर्ता गरेको हो । यसअघि फ्रेन्ड्सले चौथो चरणमा जावलाखेल युथ क्लबमाथि २–१ को जित निकालेको थियो ।

फ्रेन्ड्सको जितमा फ्रेन्ड्सको जितमा रफिक अमिनुले दुई तथा एखरोरबेक उक्तामोभ, अमित तामाङ, उत्तम राई र टोरिक जेब्रिनले समान एक गोल गरे । गोलको वर्षा गरेको खेलमा फ्रेन्ड्सले पहिलो र दोस्रो हाफमा समान तीन गोल गर्न सफल भएको थियो ।

गोलको वर्षा भएको खेलको तेस्रो मिनेटमा नै अमिनुको गोलबाट फ्रेन्ड्सले अग्रता लिन सफल भयो । ३२औं मिनेटमा एखरोरबेक उक्तामोभले गोल गर्दै फ्रेन्ड्सको अग्रता दोब्बर पारे ।

त्यसपछि ३८औं मिनेटमा अमिनुले व्यक्तिगत दोस्रो तथा टोलीका लागि तेस्रो गोल गरेपछि फ्रेन्ड्सले पहिलो हाफमा ३–० को आरामदायी अग्रता लिन सफल भयो ।

पहिलो हाफमा तीन गोल गरेको फ्रेन्ड्सले दोस्रो हाफमा उति नै गोल थप्यो । ५८औं मिनेटमा अमित तामाङले गोल गर्दै फ्रेन्ड्सलाई ४–० ले अघि बढाए ।

७०औं मिनेटमा रफिकको स्थानमा मैदान छिरेका उत्तम राईले मैदान छिरेको दोस्रो मिनेटमै गोल गरेपछि फ्रेन्ड्स फराकिलो जिततर्फ अग्रसर बन्यो । त्यसपछि इन्ज्युरी समयको थप गरिएको पाँचौं मिनेटमा टोरिक जेब्रिनले गोल गर्दै फ्रेन्ड्सलाई ६–० को फराकिलो जित दिलाए ।

यस सानदार जितसँगै फ्रेन्ड्सले नवौं चरणमा समाप्तिमा रेलिगेसन जोन छाडेको छ । फ्रेन्ड्स ९ खेलबाट ८ अंक जोडेर १२औं स्थानमा उक्लिएको छ । फ्रेन्ड्सले २ जित निकाल्दा २ बराबरी र ५ हारको नतिजा निकालेको छ । पराजित शेर्पा ९ खेलबाट ९ अंक नै जोडेर ११औं स्थानमा छ ।