एजेन्सी – जर्मन बुन्डेसलिगाको उपाधि दौडमा रहेको बायर्न म्युनिख र बोरुसिया डर्टमुन्ड बराबरीमा रोकिएका छन् । बायर्न घरेलु मैदानमा होफेनहाइनसँग १–१ गोलको बराबरीमा रोकिएको हो ।

बायर्नका बेन्जामिन पाभार्डले गोल गर्दा होफेनहाइनका एन्डरेन क्रामारिचले बराबरी गोल फर्काए । एलिएन्ज एरिना म्युनिखमा शनिबार राति भएको खेलको १७औं मिनेटमा पाभार्डको गोलबाट बायर्नले सुरुवाती अग्रता लिन सफल भएको थियो । उनले किङ्सले कोमानको पासमा गोल गर्न सफल भएका थिए ।

तर, बायर्नले त्यो अग्रतालाई जोगाउन सकेन । ७१औं मिनेटमा क्रामारिचले फ्रिकिकमा सिधै गोल गर्दै खेललाई १–१ गोलको बराबरीमा ल्याए । ७३औं मिनेटमा पाभार्डले अर्काे गोल गरेपनि भिएआरबाट मान्यता नपाउँदा बायर्न जितबाट वञ्चित बन्यो ।

अर्काे खेलमा दुई गोलको अग्रता जोगाउन नसक्दा बोरुसिया डर्टमुन्ड १० घरेलु टोली भिएफवी स्टुटगार्टसँग ३–३ गोलको बराबरीमा रोकिएको छ ।

डर्टमुन्डका सेवास्टिन हालेर, डोनेल मालेन र जियोभानी रेनाले गोल गर्दा स्टुटगार्टका टांगे कोउलीबेली, जोसवा भागनोमन र सिलास काटोम्पाले गोल गरे । स्टुटगार्ट ३९औ मिनेटमै १० खेलाडीमा समेटिन पुगेको थियो । कोन्सटानटिनोस दोहोरो पहेलो कार्ड खाँदै मैदानबाट बाहिरिए ।

डर्टमुन्डको पनि बराबरीसँगै बायर्नले आफ्नो शीर्षतालाई २ अंकमा राख्न सफल भएको छ । बायर्नको २८ खेलबाट ५९ तथा डर्टमुन्डको ५७ अंक छ । होफेनहाइन २९ अंक जोडेर १३औं स्थानमा रहँदा स्टुटगार्ट २४ अंक जोडेर १६औं स्थानमा छ ।