काठमाडौं (हाम्रो खेलकुद) – जावलाखेल युथ क्लबले सहिद स्मारक ‘ए’ डिभिजन लिगमा मनाङ–मर्स्याङ्दी क्लबमाथि सानदार जित दर्ता गरेको छ ।

च्यासल मैदानमा शनिबार भएको खेलमा जावलाखेलले मनाङमाथि ३–० को सानदार जित दर्ता गरेको हो । जावलाखेलको जितमा एनकोटो मासोएवीले दुई तथा फोडे फोफानाले एक गोल गरे । पहिलो हाफको शुरुमै एक गोल गरेको जावलाखेलले थप दुई गोल खेलको इन्ज्युरी समयमा गरेको थियो ।

खेलको चौथो मिनेटमा मासोएवीको गोलबाट जावलाखेलले पहिलो हाफमा १–० को अग्रता लिन सफल भयो । सुनिल खड्काको क्रसलाई अनमार्क रहेका एनकोटोले नियन्त्रणमा लिदै सहजै फिनिस गरे ।

प्रतिस्पर्धात्मक बनेको इन्ज्युरी समयको थप गरिएको पहिलो मिनेटमा फोडे फोफानाले गोल गर्दै जावलाखेलको अग्रता दोब्बर पारे । समिराज थोकरको क्रसमा अनमार्क रहेका फोफानाले हेडरमार्फत गोल गर्न सफल भए ।

त्यसपछि इन्ज्युरी समयको थप गरिएको पाँचौ मिनेटमा एनकोटोले व्यक्तिगत दोस्रो तथा टोलीका लागि तेस्रो गोल गर्दै जावलाखेललाई ३–० को सानदार जित दिलाए ।

फोफानाको पासमा उनले अफसाइड बिट ट्याप गर्दै गोलरक्षक तथा कप्तान दीप कार्कीलाई बिट गर्दै गोल गर्न सफल भए । जारी लिगमा उनको यो छैटौं गोल हो ।

जावलाखेलविरुद्ध मनाङले भने कुनै पनि समय उल्लेख्य आक्रमण बुन्न नसक्दा लिगमा लगातार दोस्रो हार बेहोर्न पुग्यो । मनाङ यसअघि सातदोटो युथ क्लबसँग १–० ले पराजित हुँदै लिगमा अपराजित यात्रामा पूर्णविराम लागेको थियो ।

यस जितसँगै जावलाखेल ९ खेलबाट १७ अंक जोडेर शीर्षस्थानमा उक्लिएको छ । पराजित मनाङ १५ अंक जोडेर तेस्रो स्थानमा झरेको छ ।