लमजुङ (हाम्रो खेलकुद) – दुधपोखरी गाउँपालिका वडा नम्वर ६ को बेत्यानी युवा क्लबले तेस्रो संस्करणको खुल्ला सेभेन ‘ए’ साइड पुरुष फुटबल प्रतियोगिताको उपाधि जितेको छ ।

राइनास नगरपालिका वडा नम्वर १ को बोराङखोला युथ क्लबलाई शुक्रबार सडन डेथमा १२–११ ले पराजित गर्दै बेत्यानीले उपाधि जित्न सफल भएको हो ।

राइनास नगरपालिका वडा नम्वर १० स्थित प्यारजुङको फुटबल ग्राउन्डमा निकै नै रोमाञ्चक र प्रतिस्पर्धात्मक बनेको निर्धारित समय र थप गरिएको समयमा पनि कुनै गोल निस्कन नसकेपछि खेल टाइब्रेकरमा पुगेको थियो । टाइब्रेकरमा पनि बराबरीपछि खेल सडनडेथमा पुग्दा बेत्यानीले बाजी मार्यो ।

उपाधिसँगै बेत्यानीले ९० हजार रुपैयाँ, शिल्ड मेडल र प्रमाणपत्र प्राप्त गरेको छ । दोस्रो भएको बोराङखोलाले ५० हजार रुपैयाँ, शिल्ड मेडल र प्रमाणपत्र हात पारेको छ ।

बेत्यानीका अनुराग जिसी प्रतियोगिताको सर्वाेत्कृष्ट खेलाडी घोषित भए । बेत्यानीका किरण तामाङ सर्वाधिक गोलकर्ता भए । उनले प्रतियोगिताभर १० गोल गरे ।

बेत्यानीकै मनोज अधिकारी उत्कृष्ट गोलरक्षक तथा बोराङखोलाका विजय गुरुङ उत्कृष्ट डिफेन्डर चुनिदा प्यारजुङ युवा क्लब अनुशाषित टिम बन्यो । उनीहरु सबैले ट्रफीसँगै १ हजार रुपैयाँ प्राप्त गरे ।

विजयी खेलाडीलाई पहिलो प्रायोजन गर्ने गोविन्दमान घर्तीका बुवा दुर्गामान घर्ती, राइनास नगरपालिकाकी पुर्व उपमेयर धनकुमारी गुरुङ, राइनास नगरपालिका वडा नम्वर १० की महिला सदस्य दुर्गा माया गुरुङ, कृष्ण बहादुर गुरुङ, ठाकुर प्रसाद गुरुङ, हेमनाथ (हेमन्त) गुरुङ र क्लबका अध्यक्ष विशाल गुरुङलगायतले पुरस्कृत गरे ।

२५ चैतबाट शुरु भएको प्रतियोगितामा २२ टोलीले नकआउटको आधारमा प्रतिस्पर्धा गरेका थिए । प्यारजुङ युवा क्लबले विगत ३ वर्षयता नयाँ वर्षको अवसर पारेर सेभेन ‘ए’ साइड फुटबल प्रतियोगिता आयोजना गर्दै आइरहेको छ ।