काठमाडौं (हाम्रो खेलकुद) – फरवार्ड ओलावाले अफिज एक्लैले ५ गोल गरेपछि मच्छिन्द्र फुटबल क्लबले सहिद स्मारक ए डिभिजन लिग अन्तर्गत फुटबल क्लब खुमलटारविरुद्ध गोलको वर्षा गर्दै जित हासिल गरेको छ ।

च्यासल मैदानमामा मच्छिन्द्रले ७-३ को फराकिलो जित दर्ता गरेको हो । मच्छिन्द्रका लागि अफिजले लिगको पहिलो ह्याट्रिक पूरा गर्ने क्रममा ५ गोल गर्दा विमल घर्ती मगरले अर्को गोल गरे । खुमलटारका लागि मेसुके ओलोमोउले २ तथा स्टेफन बिनोङले १ गोल गरे ।

खेलको २४ औं मिनेटमा आफिजले सुरुवाती अग्रता दिलाए । सुरज विकको लामो पासलाई अफिजले शारीरिक शक्तिको उपयोग गर्दै उत्कृष्ट टर्न गरे । भारतीय डिफेन्डर सान्विल कोस्टालाई पेनाल्टी क्षेत्र बाहिर बिट गरेपछि पेनाल्टी क्षेत्रभित्र लगेर उनले फिनिस गरे ।

त्यसको ५ मिनेट नबित्दै आफिजले दोस्रो गोल गरे । चेन्चो ग्याल्सेनको पासमा डिफेन्स लाइन बिट भएपछि गोलरक्षकसँग वन भर्सेस वनमा बल फुस्केपनि पेनाल्टी क्षेत्रभित्र रिबाउन्डमा आफिजले गोल गरे ।

इन्ज्युरी समयको तेस्रो मिनेटमा विमलले तेस्रो गोल गरे । चेन्चोको सुरुवाती प्रहार गोलरक्षक देव लिम्बुले जोगाएपनि फर्केर आएको बललाई विमलले नियन्त्रणमा लिँदै दोस्रो टचमा गोल गरे ।

दोस्रो हाफको ५६ औं मिनेटमा आफिजले ह्याट्रिक पूरा गरे । विमलले गोलरक्षक देव लिम्बुलाई छक्याएर गरेको प्रहार पदम भट्टराईले हातले रोकेपछि रेफ्रीले पेनाल्टी दिए । आफिजले उक्त पेनाल्टीमा गोल गर्दै ४-० को अग्रता दिलाए ।

६१ औं मिनेटमा मेसुके ओलोमोउले खुमलटारका लागि गोल गर्दै खेलमा फर्कने संकेत दिए । स्टेफन बिनोङको पासमा मेसुकेले पेनाल्टी क्षेत्र भित्रबाट फिनिस गरेका थिए ।

तर एक मिनेट नबित्दै आफिजले ४ गोलको अग्रता पुन: स्थापना गरे । पुजनले मिडफिल्डबाट दिएको पासलाई आफिजले गोलरक्षक देवको टाउको माथिबाट प्रहार गर्दै आफ्नो व्यक्तिगत चौथो गोल गरे ।

६७ औं मिनेटमा आफिजले व्यक्तिगत पाँचौ गोल गरे । आन्द्रेस नियाको लामो पासलाई आफिजले हेडरमार्फत गोल गरे । ७६ औं मिनेटमा स्टेफन बिनोङले खुमलटारका लागि पेनाल्टीमा गोल गर्दै स्कोर ६-२ को स्थितिमा ल्याए । ८१ औं मिनेटमा मेसुकेले व्यक्तिगत दोस्रो गोल गर्दै स्कोर ६-३ बनाए ।

८३ औं मिनेटमा मच्छिन्द्रका प्रशान्त अवस्थीको शक्तिशाली प्रहार क्रसबारको भित्रि भागमा लाग्दै फर्कियो । ८७ औं मिनेटमा वैकल्पिक फरवार्ड विजय भुजेलले गोल गर्दै मच्छिन्द्रको अग्रता ७-३ मा बढाए ।

यस जितसँगै मच्छिन्द्रले ८ खेलमा ३ जित, ३ बराबरी र २ हारसँगै १२ अंक जोडेको छ । खुमलटार ८ खेलमा ७ अंकका साथ दशौं स्थानमा छ ।

यस्तै एन्फा कम्प्लेक्समा भएको खेलमा त्रिभुवन आर्मी क्लबले जावलाखेल युवा क्लबलाई ३-१ ले पराजित गर्यो । आर्मीका लागि जिलेस्पी जंग कार्की, नवयुग श्रेष्ठ र सुदिल राईले गोल गरे । जावलाखेलका सुनिल खड्काको गोल सान्तवना सिमित भयो ।