काठमाडौं (हाम्रो खेलकुद) – नाइजेरियन फरवार्ड ओलावाले आफिजले सहिद स्मारक ए डिभिजन लिग २०७९ को पहिलो ह्याट्रिक पूरा गरेका छन् । खुमलटारविरुद्ध च्यासल मैदानमा पहिलो हाफमै २ गोल गरेका आफिजले दोस्रो हाफमा २ गोल थापिसकेका छन् । ६२ औं मिनेटमा मच्छिन्द्र ५-१ ले अघि छ ।

खेलको २४ औं मिनेटमा आफिजले सुरुवाती अग्रता दिलाए । सुरज विकको लामो पासलाई अफिजले शारीरिक शक्तिको उपयोग गर्दै उत्कृष्ट टर्न गरे । भारतीय डिफेन्डर सान्विल कोस्टालाई पेनाल्टी क्षेत्र बाहिर बिट गरेपछि पेनाल्टी क्षेत्रभित्र लगेर उनले फिनिस गरे ।

त्यसको ५ मिनेट नबित्दै आफिजले दोस्रो गोल गरे । चेन्चो ग्याल्सेनको पासमा डिफेन्स लाइन बिट भएपछि गोलरक्षकसँग वन भर्सेस वनमा बल फुस्केपनि पेनाल्टी क्षेत्रभित्र रिबाउन्डमा आफिजले गोल गरे ।

इन्ज्युरी समयको तेस्रो मिनेटमा विमलले तेस्रो गोल गरे । चेन्चोको सुरुवाती प्रहार गोलरक्षक देव लिम्बुले जोगाएपनि फर्केर आएको बललाई विमलले नियन्त्रणमा लिँदै दोस्रो टचमा गोल गरे ।

दोस्रो हाफको ५६ औं मिनेटमा आफिजले ह्याट्रिक पूरा गरे । विमलले गोलरक्षक देव लिम्बुलाई छक्याएर गरेको प्रहार पदम भट्टराईले हातले रोकेपछि रेफ्रीले पेनाल्टी दिए । आफिजले उक्त पेनाल्टीमा गोल गर्दै ४-० को अग्रता दिलाए ।

६१ औं मिनेटमा मेसुके ओलोमोउले खुमलटारका लागि गोल गर्दै खेलमा फर्कने संकेत दिएका छन् । स्टेफन बिनोङको पासमा मेसुकेले पेनाल्टी क्षेत्र भित्रबाट फिनिस गरेका थिए ।

तर एक मिनेट नबित्दै आफिजले ४ गोलको अग्रता पुन: स्थापना गरे । पुजनले मिडफिल्डबाट दिएको पासलाई आफिजले गोलरक्षक देवको टाउको माथिबाट प्रहार गर्दै आफ्नो व्यक्तिगत चौथो गोल गरे ।