काठमाडौं (हाम्रो खेलकुद) – विदेशी खेलाडी अनुबन्ध गरेको पहिलो खेलमै विभागीय टोली नेपाल पुलिस क्लबले सहिद स्मारक ए डिभिजन लिग २०७९ मा पहिलो जित दर्ता गरेको छ ।

सातदोबाटोस्थित एन्फा कम्प्लेक्सको मैदानमा पुलिसले फ्रेन्ड्सलाई ३-१ ले पराजित गरेको हो । पुलिसको जितमा बुद्ध बल तामाङले २ गोल गर्दा डेब्यु गरिरहेका विदेशी खेलाडी मोजेस टुमले १ गोल गरे । फ्रेन्ड्सका तोरीच जेब्रिनले एक गोल फर्काएका थिए ।

पहिलो हाफ गोलरहित भएपछि दोस्रो हाफको ५१ औं मिनेटमा मोजेसले पुलिसलाई सुरुवाती अग्रता दिलाए । यसै खेलबाट मिडफिल्डर जो आइडु र मोजेसले पुलिसका लागि लिगमा डेब्यु गरेका थिए । बुद्ध बल तामाङले ५८ औं मिनेटमा पुलिसको अग्रता दोब्बर पारे ।

निर्धारित समयको ३ मिनेट बाँकी रहँदा फ्रेन्ड्सले खेलमा फर्कने संकेत दियो । तोरीचले पेनाल्टी क्षेत्र भित्रबाट गोल गर्दै अग्रता २-१ मा झारे । तर इन्ज्युरी समयमा बुद्धले व्यक्तिगत दोस्रो गोल गर्दै पुलिसको पहिलो जित पक्का गरे ।

यस्तै दशरथ रंगशालामा भएको खेलमा चर्च ब्वाइज र एपिएफले अंक बाँडे । गोलरहित बराबरीमा सकिएको खेलमा चर्च ब्वाइजको तीन प्रहार पोस्टमा लागेको थियो । दोस्रो हाफमा जोस्पे बेम्पाले गोल गरेपनि असिस्टेन्ट रेफ्रीले अफसाइडको विवादास्पद निर्णय दिँदा चर्च ब्वाइज जितबाट बन्चित भएको थियो ।