मकवानपुर(हाम्रो खेलकुद) – सुमन भोम्जन स्मृति खेलकुद प्रतिष्ठानको आयोजनामा हेटौंडामा जारी अन्तर्राष्ट्रिय आमन्त्रण हेटौंडा गोल्डकप फुटबल प्रतियोगितामा पोखराको साहारा क्लव सेमीफाइनल प्रवेश गरेको छ । मङ्गलबार दिल्ली यूनाइटेड एफसी भारतलाई टाइब्रेकरमा ३–२ गोल अन्तरले हराउँदै साहाराले सेमिफाइनलमा स्थान पक्का गरेको हो ।

निर्धारित समय १–१ गोलको बराबरीमा टुङ्गिएपछि टाइब्रेकर मार्फत निर्णय लिइएको थियो । खेलको ३९ औं मिनेटमा दिल्लीका ऋषि रातोकार्ड पाउँदै मैदानबाट बाहिरिएपनि आफ्नो दबाव कायमै राखेको थियो । १० खेलाडीमा सीमित दिल्लीका लागि दोस्रो हाफको १६ औं मिनेटमा जोनाथोनले गोल गरेका थिए । क्याप्टेन डोन लेप्चाको क्रसलाई सदुपयोग गर्दै जोनाथोनले हेड मार्फत गोल गरेका हुन् ।

निकै दवावमा रहेको साहाराका रिचार्ड पुनले दोस्रो हाफको २८ औं मिनेटमा खेललाई बराबरीमा फर्काए । रोशन मालीको फ्रि–किकलाई पुनले पोष्टको दिशा दिएका हुन् । त्यसपछि दुवै टिमले केही राम्रा मूभहरु बनाएपनि थप गोल गर्न नसक्दा खेल टाइ ब्रेकर तर्फ ढकेलियो ।  ।

टाइब्रेकरमा साहाराका गोलरक्षक सोजित गुरुङ नायक बने । उनले ३ वटा प्रहार बचाउ गरेका थिए । दिल्ली यूनाइटेडका लोगो, गाले र रोशन क्षेत्रीको प्रहार सुजितले रोकेका हुन् । दिल्लीको तर्फबाट डोन लेप्चा र मारुफले मात्र गोल गरे । यता साहाराको तर्फबाट टाइब्रेकरमा बिष्णु गुरुङ, शिव सुवेदी र प्रदीप गुरुङले गोल गरे । सुसन गुरुङको प्रहार दिल्लीका गोलरक्षक सन्जुले रोकेका थिए ।

खेलको म्यान अफ दी म्याच साहाराका गोलरक्षक सोजित घोषित हुँदै नगद ३ हजारसहित ट्रफी प्राप्त गरे । जारी प्रतियोगितामा बुधबार गत बर्षको उपविजेता नेपाल आर्मी र संकटा क्लवको बीचमा खेल हुनेछ । २३ गतेसम्म सञ्चालन हुने प्रतियोगिताको विजेता र उपविजेताले क्रमश  नगद ५ लाख र ३ लाख रुपियाँ प्राप्त गर्नेछ ।