एजेन्सी – इंग्लिस प्रिमियर लिगमा म्यानचेस्टर युनाइटेडले सफलता हात पार्दा चेल्सीले अर्काे हार बेहोरेको छ । युनाइटेडले घरेलु मैदानमा एभर्टनलाई २–० ले पराजित गरेको छ ।

युनाइटेडको जितमा स्कट म्याकटोमिने र एन्थोनी मार्सियालले गोल गरे । ओल्ड ट्राफोर्डमा शनिबार राति भएको खेलको ३६औं मिनेटमा म्याक टोमिनेको गोलबाट युनाइटेडले पहिलो हाफमा १–० को अग्रता लिन सफल भयो ।

उनले जेडान सान्चोको पासमा गोल गर्न सफल भएका थिए । त्यसपछि ७१औं मिनेटमा एन्थोनी मार्सियालले मार्कस रासफर्डको पासमा गोल गर्दै टोलीलाई २–० को सहज जित दिलाए ।

यस जितसँगै युनाइटेड २९ खेलबाट ५६ अंक जोडेर चौथो स्थानमा यथावत् रहेको छ । समान ५६ अंक नै रहेपनि न्यूक्यासल युनाइटेड गोल अन्तरमा अघि छ । पराजित एभर्टन २७ अंक जोडेर १७औं स्थानमा छ ।

अर्काे खेलमा चेल्सी घरेलु टोली वल्भ्ससँग १–० ले पराजित भएको छ । वल्भ्सको जितमा पहिलो हाफमा म्याथिअस नुनेसले गरेको गोल नै निर्णायक बन्यो ।

अन्तरिम प्रशिक्षक बनेका फ्रान्क लाम्पार्डले आफ्नो पहिलो प्रशिक्षणमा चेल्सीलाई सफलता दिलाउन सकेनन् । यस जितसँगै वल्भ्स ३० खेलबाट ३१ अंक जोडेर १२औं स्थानमा उक्लिएको छ । समान ३० खेलबाटै ३९ अंक जोडेर चेल्सी ११औं स्थानमा छ ।

अन्य नतिजा
एस्टन भिल्लाविरुद्ध नटिङहम (२–०)
ब्रेन्टफर्डविरुद्ध न्यूक्यासल (१–२)
फुलहमविरुद्ध वेस्ट ह्याम (०–१)
लेस्टरविरुद्ध बर्नमाउथ (०–१)
टोटेनहमविरुद्ध ब्राइटन (२–१)
साउथह्याम्टनविरुद्ध म्यानचेस्टर सिटी (१–४)