एजेन्सी – इटालियन सिरी ‘ए’ मा शीर्षस्थानमा रहेको नेपोलीले संघर्षपूर्ण जित निकाल्दा इन्टर मिलान र एसी मिलान बराबरीमा रोकिएका छन् ।

नेपोलीले घरेलु टोली लेसमाथि २–१ को संघर्षपुर्ण जित निकाल्दै उपाधि जित्ने सम्भावना बलियो बनाएको हो । नेपोलीको जितमा जियोभानी डि लोरेन्जोले गोल गर्दा एक गोल उपहार पाएको थियो । लेसका फेडरिको डि फ्रान्सिस्कोले गोल फर्काए ।

लेसमा शुक्रबार राति भएको खेलको १८औं मिनेटमा जियोभानी डि लोरेन्जोको गोलबाट नेपोलीले सुरुवाती अग्रता लिन सफल भयो । उनले मिन जाई किमको पासमा गोल गर्न सफल भएका थिए ।

५२औं मिनेटमा फेडरिकोले गोल गर्दै खेललाई १–१ गोलको बराबरीमा ल्याए । ६४औं मिनेटमा लादमिरो फाल्कोनले आत्मघाती गोल गरेपछि नेपोली खेलमा २–१ ले अघि बढ्यो । त्यसपछि थप गोल निस्कन नसक्दा नेपोली विजयी हुन सफल भयो ।

यस जितसँगै शीर्षस्थानमा रहेको नेपोलीले दोस्रो स्थानको लाजियोमाथि १९ अंकको अग्रता बनाएको छ । नेपोलीको २९ खेलबाट ७४ अंक पुगेको छ । एक खेल कम खेलेको लाजियोको ५५ अंक छ । पराजित लेस २७ अंक जोडेर १६औं स्थानमा छ ।

अर्काे खेलमा सुरुवाती अग्रता जोगाउन नसक्दा इन्टर मिलान घरेलु टोली सालेरनिटानासँग १–१ गोलको बराबरीमा रोकिएको छ । इन्टरका रोविन गोसेन्सले गोल गर्दा सालेरनिटानाका एन्टोनियो कानड्रेभाले अन्तिम समयमा गोल गर्दै टोलीलाई हारबाट जोगाए ।

यस बराबरीसँगै यन्टर २९ खेलबाट ५२ अंक जोडेर चौथो स्थानमा यथावत रहेको छ । सालेरनिटाना २९ अंक जोडेर १५औं स्थानमा छ ।

अर्काे खेलमा एसी मिलान र इम्पोलीले गोलरहित बराबरी खेल्दै अंक बाँडेका छन् । यस बराबरीले मिलान २९ खेलबाट ५२ अंक जोडेर तेस्रो स्थानमा यथावत रहेको छ । इम्पोली ३२ अंक जोडेर १४औं स्थानमा छ ।