एजेन्सी – ब्राजिललाई टाइब्रेकरमा पराजित गर्दै इंग्ल्यान्ड पहिलो महिला फाइनालिसिमाको च्याम्पियन बनेको छ । इंग्ल्यान्डले नाटकीय बनेको टाइब्रेकरमा ब्राजिललाई ४–२ ले पराजित गर्दै उपाधि जित्न सफल भएको हो ।

निर्धारित समयमा १–१ गोलको बराबरीपछि खेल टाइब्रेकरमा लम्बिएको थियो । जसमा इंग्ल्यान्डले बाजी मारेको हो । टाइब्रेकरमा इंग्ल्यान्डकी इंग्ल्यान्डकी जर्जिया स्टानवे, रचेल डाली, एलेक्स ग्रिनवुड र केलीले गोल गरिन् । टोनीले गोल गर्न सकिनन् ।

ब्राजिलकी एड्रिना र केरोलिनले मात्रै गोल गर्न सफल भइन् । तामिरेसको प्रहारलाई इंग्ल्यान्डकी गोलरक्षकले बचाउँदा राफाइलको प्रहार क्रस बारमा लाग्दै बाहिरियो ।

त्यसअघि वेम्वली स्टेडियममा बिहीबार राति भएको प्रतिस्पर्धात्मक र रोमाञ्चक बनेको खेलको २३औं मिनेटमा इला टोनको गोलबाट घरेलु टोली इंग्ल्यान्डले सुरुवाती अग्रता लिन सफल भएको थियो ।

तर, त्यो अग्रतालाई इंग्ल्यान्डले अन्तिम समयमा जोगाउन सकेन । ९०औं मिनेटमा परिवर्तित खेलाडी आन्द्रेसा अल्भेसले गोल गर्दै खेललाई १–१ गोलको बराबरीमा ल्याइन् ।

यस नतिजासँगै इंग्ल्यान्डले आफ्नो अपराजित यात्रालाई ३० खेलसम्म लम्ब्याउन सफल भएको छ । जसमा २५ जित र ५ बराबरीमा नतिजा छ ।

गत वर्षदेखि युरो च्याम्पियनसिप र दक्षिण अमेरिकाको कोपा अमेरिका च्याम्पियनबीच फाइनालिसिमा खेलाउने निर्णय गरेको थियो । गत वर्ष नै पुरुषतर्फ अर्जेन्टिनाले इटालीलाई हराएर उपाधि जितेको थियो ।