एजेन्सी – फ्रान्सेली फरवार्ड करिम बेन्जेमाले बुधबार राति भएको ‘एल क्लासिको’ मा ह्याट्रिक पूरा गर्दै नयाँ इतिहास रचेका छन् ।

बार्सिलोनाको घरेलु मैदान स्पोटिफाई क्याम्प नोउमा ह्याट्रिक पूरा गरेपछि बेन्जेमाले नयाँ कीर्तिमान बनाएको हो । स्पेनिस कोपा डेल रेको सेमिफाइनलको दोस्रो लेगमा ४–० को जित निकालेको खेलमा बेन्जेमाले ह्याट्रिक पूरा गर्दा रियल समग्रमा ४–१ को जितसहित फाइनलमा प्रवेश गरेको छ ।

बेन्जेमा सन् १९९५ मा इभान जामोरानोपछि एल क्लासिकोमा ह्याट्रिक गर्ने पहिलो रियल म्याड्रिड खेलाडी बनेका छन् । यस्तै बेन्जेमा ६० वर्षपछि अर्थात् सन् १९६३ मा फेरेन्क पुस्कासपछि बार्सिलोनाको मैदानमा ह्याट्रिक पूरा गर्ने पहिलो खेलाडी बनेका छन् ।

हंगेरीका पुस्कासले त्यसबेला नोउ क्याम्प र सान्टियागो बर्नबेउमै ह्याट्रिक पूरा गरेका थिए । बेन्जेमाको यो लगातार दोस्रो ह्याट्रिक हो । यसअघि उनले स्पेनिस ला लिगामा रियल भालाडोलिडविरुद्ध ह्याट्रिक पूरा गरेका थिए ।

यस्तै रियलले १९९५ को जनवरी यता बार्सिलोनाविरुद्ध पहिलोपटक चार गोलको अन्तरमा जित निकालेको हो । यसअघिका केही खेलहरुमा रियलले जित निकालेपनि चार गोलको अन्तरमा जित निकाल्न सकेको थिएन ।