काठमाडौं (हाम्रो खेलकुद) – सोमबार देखि शुरु भएको सहिद स्मारक ‘ए’ डिभिजन लिगको छैटौ राउन्डको खेलमा संकटा क्लब र विभागीय नेपाल एपिएफ क्लबले सफलता हात पारेका छन् ।

संकटाले खुमलटार युवा क्लबलाई १–० ले पराजित गरेको हो । सातदोबाटोस्थित एन्फा कम्प्लेक्समा सोमबार भएको खेलमा संकटाको जितमा पहिलो हाफमा जुनियर एनकेन्गेले गरेको गोल नै निर्णायक बन्यो । उनले २७औं मिनेटमा गोल गर्न सफल भएका थिए ।

यो सिजनमा संकटाको यो दोस्रो जित हो । दोस्रो जितसँगै संकटा ६ खेलबाट ९ अंक जोडेर छ्रैटौं स्थानमा उक्लिएको छ । पराजित खुमलटार ६ खेलबाट ६ अंक जोडेर नवौं स्थानमा झरेको छ ।

अर्काे खेलमा एपिएफले पुलिसलाई २–० ले पराजित गरेको छ । च्यासल मैदानमा एपिएफको जितमा हरि कार्की र सविन गुरुङले गोल गरे । दुवै गोल दोस्रो हाफका भएको थियो ।

खेलको ५८औं मिनेटमा हरि कार्कीको गोलबाट एपिएफले १–० को अग्रता लिन सफल भयो । त्यसपछि इन्ज्युरी समयको थप गरिएको नवौं मिनेटमा परिवर्तित खेलाडी सविन गुरुङले गोल गर्दै एपिएफलाई २–० को जित दिलाए । सविन ९०औं मिनेटमा नविन लामाको स्थानमा मैदान छिरेका थिए ।

यो सिजन निकै नै खराव लयमा रहेको पुलिसको यो पाँचौ हार हो । पुलिस ६ खेलबाट १ अंक जोडेर पुछारमा छ । पुलिसलाई हराएको एपिएफ ६ खेलबाट १० अंक जोडेर पाँचौ स्थानमा उक्लिएको छ । समान १० अंक नै भएपनि जावलाखेल गोल अन्तरमा अघि छ ।

लिगमा मंगलबार दुई खेल हुनेछ । च्यासल रंगशालामा न्युरोड टिम (एनआरटी) र चर्च ब्वाइज युनाइटेड तथा एन्फा कम्प्लेक्समा जावलाखेल युथ क्लब र सातदोबाटो युथ क्लबबीच प्रतिस्पर्धा हुनेछ ।