एजेन्सी – ब्राजिली फरवार्ड गाब्रिएल जेससको उच्च प्रदर्शनमा इंग्लिस प्रिमियर लिगको शीर्षस्थानमा रहेको आर्सनलले सानदार जित हात पारेको छ ।

आर्सनलले घरेलु मैदानमा लिड्स युनाइटेडमाथि ४–१ को सानदार जित दर्ता गरेको हो । आर्सनलको जितमा जेससले दुई गोल गर्दा बेन ह्वाइट र ग्रानिट झाँकाले समान एक गोल गरे । लिड्सका रसमुस क्रिस्टेन्सेनले एक गोल फर्काए ।

इमिरेट्स स्टेडियम लन्डनमा आइतबार राति भएको एक पक्षीय खेलमा घरेलु टोली आर्सनलले खेलको ३५औं मिनेटमा जेससको पेनाल्टी गोलबाट अग्रता लिएको थियो । पेनाल्टी बक्समा लुक एलिङले फउल गरेपछि प्राप्त पेनाल्टीमा जेसस आँफैले गोल गर्न सफल भए ।

४७औं मिनेटमा बेन ह्वाइटले गोल गर्दै आर्सनलको अग्रता दोब्बर पारे । उनले गाब्रिएल मार्टिनेलीको पासलाई सदुपयोग गरे । ५५औं मिनेटमा जेससले व्यक्तिगत दोस्रो तथा टोलीका लागि तेस्रो गोल गर्दै आर्सनललाई सहज जिततर्फ अग्रसर गराए । उनले लियान्द्रो ट्रोससार्डको पासमा गोल गर्न सफल भए ।

७६औं मिनेटमा रसमुसले गोल गर्दै खेललाई ३–१ ले स्थितिमा ल्याए । त्यसपछि ८४औं मिनेटमा ग्रानिट झाँकाले मार्टिन ओडेगार्डको पासमा गोल गदै आर्सनललाई सानदार जित दिलाए ।

यस जितसँगै शीर्षस्थानमा रहेको आर्सनलले ८ अंककै अग्रता कायम राख्न सफल भएको छ । आर्सनलको २९ खेलबाट ७२ अंक पुगेको छ । एक खेल कम खेलेको सिटीको ६४ अंक छ । पराजित लिड्स २६ अंक जोडेर १६औं स्थानमा छ ।

अन्य नतिजा
म्यानचेस्टर सिटीविरुद्ध लिभरपुल (४–१)
बर्नमाउथविरुद्ध फुलहम (२–१)
ब्राइटनविरुद्ध ब्रेन्टफर्ड (३–३)
क्रिस्टल प्यालेसविरुद्ध लेस्टर सिटी (२–१)
नटिङहम फरेस्टविरुद्ध वल्भ्स (१–१)