धनगढी (हाम्रो खेलकुद) – मनाङ मस्र्याङ्दी क्लब छैठौं संस्करणको मुख्यमन्त्री सुदूरपश्चिम खप्तड गोल्डकपको फाइनलमा प्रवेश गरेको छ । धनगढी रंगशालामा बुधबार भएको खेलमा क्यामरुनको एभिनर फुटबल क्लबलाई ६–० को फराकिलो अन्तरले हराउँदै मनाङ उपाधि नजिक पुगेको हो ।

कागजी प्रक्रिया पूरा गर्न नसकेपछि क्यामरुनका दुई जना खेलाडीले खेल्न पाएनन् । ९ जनाको टोली मनाङविरुद्ध मैदान उत्रिएको थियो । मनाङलाई जित दिलाउन सायीजमलले ह्याट्रिक गरे । जीवन गुरुङ, प्रशन्न श्रेष्ठ, अनिल गुरुङ र मनाङका लागिखेलको १२ औं मिनेटमा जीवन गुरुङले गोल गरेका थिए । पहिलो हाफमा १–० को अग्रता लिएको मनाङले सात खेलाडीमा सिमित हुन पुगेको एभिनरमाथि दोस्रो हाफमा फाइदा उठायो ।

पहिलो हाफमा फउल गरेका जोर्डन जुनियरले पहेलो कार्ड पाए । उनले त्यसको विरोधमा विपक्षी टोली र रेफ्रीसँग गरेको व्यवहारका कारण रातो कार्ड पाएर बाहिरिनु पर्यो । त्यसको केहि मिनेट पछि गोल किपर विल्सनले पनि रातो कार्ड पाएपछि एभिनरको टीम सात जनामा सिमित रहन पुगेको थियो ।

खेलको ५४ औं मिनेटमा प्रसन्न श्रेष्ठले गोल गरे । ५९ औं, ६७ औं र ७७ औं मिनेटमा सायिजमलले गोल गर्दै ह्याट्रिक पूरा गरेपछि टोलीले ५–० को अग्रता बनायो । खेलको ८१ औं मिनेटमा अनिल गुरुङले मनाङका लागि छैठौं गोल गरे । क्यामरुनले आज ४ खेलाडीको अनुपस्थितिमा पनि मैदानमा केहि अवसर बनायो तर गोल गर्न सकेन ।

मनाङका सायिजमलले आजको खेलको ‘एसपीए म्यान अफ दि म्याच’ चुनिएर १० हजार रुपैयाँ प्राप्त गरे । बिहीबार हुने आयोजक सुदूरपश्चिम–११ स्पोर्टस क्लब र थ्री स्टार क्लवबीच दोस्रो सेमीफाइनलको विजेतासंग मनाङले उपाधिका लागि खेल्ने छ । दोस्रो सेमिफाइनल खेल विहिबार दिउँसो ३ः३० बजे सुरु हुनेछ ।
मोफसलको सर्वाधिक पुरस्कार राशीको प्रतियोगिताको विजेताले २१ लाख रुपैयाँ र दोस्रो हुने टोलीले १० लाख रुपैयाँ प्राप्त गर्नेछन् । प्रतियोगिताको सुदूरपश्चिम प्रदेश सरकार मुख्य प्रबद्र्धक रहेको छ ।