एजेन्सी – प्रशिक्षक एन्टोनियो कोन्टेले १६ महिनाको जिम्मेवारीपछि आपसी सहमतिमा इंग्लिस क्लब टोटेनहम हटस्पर छोडेका छन् ।

कोन्टेले स्पर्स खेलाडीहरूलाई ‘स्वार्थी’ र क्लबको संस्कृतिको आलोचना गरेपछि उनी र क्लबबीच असमझदारी बढेको थियो । टोटेनहम प्रिमियर लिगमा चौथो स्थानमा रहँदा अन्य प्रतियोगिताबाट बाहिरिसकेको छ ।

कोन्टेले क्लब छाडेसँगै उनका सहायक क्रिस्टियन स्टेलिनीले बाँकी सिजन क्लब सम्हाल्नेछन् । पूर्व मिडफिल्डर रायन मेसनलाई उनको सहायक हुनेछन् ।

‘हामीसँग प्रिमियर लिगका १० खेलहरू बाँकी छन् र च्याम्पियन्स लिगमा स्थानका लागि हाम्रो हातमा लडाइँ छ,’ क्लबका अध्यक्ष डेनियल लेभीले भने, ‘हामी सबैलाई आवश्यक छ । हाम्रो क्लब र अद्भुत, वफादार समर्थकहरूको लागि उच्चतम सम्भव फिनिश सुनिश्चित गर्न सबैले कदम चाल्नुपर्छ ।’

कोन्टे बाहिरिएसँगै टोटेनहम मौरिसियो पोचेटिनोले सन् २०१९ मा क्लब छोडेपछि चार वर्षमा चौथो स्थायी प्रशिक्षकको खोजी गरिरहेको छ ।

टोटेनहमले मार्चको सुरुमा च्याम्पियन्स लिगमा एसी मिलानसँग हार बेहोरेको थियो । त्यसपछि च्याम्पियनसिप क्लब सेफिल्ड युनाइटेडसँग पराजित हुँदै टोटेनहम एफए कपबाट बाहिरिएको थियाे ।

चेल्सी, युभेन्ट्स र इन्टर मिलानबाट लिग उपाधि जितेका इटालियन कोन्टेलाई नोभेम्बर २०२१ मा नुनो एस्पिरिटो सान्तोलाई बर्खास्त गरेपछि नियुक्त गरेको थियो ।

साउथह्याम्प्टनसँग ३–१ को जित निकालेको खेलमै कोन्टेले खेलपछि आफ्ना खेलाडी र क्लबको चर्को आलोचना गरेका थिए । ‘टोटेनहमको कथा यो हो । २० वर्षदेखि यो मालिक छ र उनीहरूले कहिल्यै केही जितेनन् । किन ?’ कोन्टेले भने, ‘यो क्लबसँगै प्रशंसकहरूका लागि पनि स्वीकार्य छैन ।’ लेभीको अध्यक्षतामा रहेको स्वामित्व समूहले सन् २००१ मा क्लब लिएपछि टोटेनहमले सन् २००८ मा लिग कप उपाधि जितेको थियो ।